TANESCO YAWAONYA WACHAKACHUAJI WA MITA MIAKA MITANO JELA ITAWAHUSU

Msimamizi wa Kitengo cha Mita Mkoa wa Arusha, Charles John.   

NA MWANDISHI WETU-ARUSHA

SHIRIKA la Umeme nchini (TANESCO), limewataka wananchi wa mikoa ya Kaskazini kujiepusha na vitendo vya kuchakachua Mita za umeme kwani atakayekutwa ametenda kosa hilo atafungwa jela miaka mitano.

Wizi huo wa umeme unayofanywa na baadhi ya wateja wasio waaminifu umetajwa kuendelea kupoteza mapato yanayopaswa kukusanywa na shirika hilo kutokana na kutumia umeme usiolipiwa.

Kauli hiyo ilitolewa jana kwenye Viwanja vya Maonyesho ya Nane Nane ya Kilimo na Mifugo Kanda ya Kaskazini Njiro mjini hapa na Msimamizi wa Kitengo cha Mita Mkoa wa Arusha, Charles John.   

Alisema vitendo vya uchakachuaji wa Mita za umeme vinavyolenga kupata huduma bure bila kulipia gharama yeyote ni uhujumu uchumi kwa taifa havifai kufumbiwa macho.

“Niombe wananchi wawe wazalendo na nchi yao, wawafichue wanaoharibu Mita za umeme. Lakini pia wakumbeke vitendo hivyo ni hatari kwa usalama wa maisha yao pindi wanapofanya mchezo huo hatari,” alisema John na kuongeza:

“Tupo hapa kwenye banda letu ndani ya viwanja vya maonyesho ya Nane Nane Njiro tukishiriki kutoa elimu pana kwa wananchi juu ya matumizi sahihi ya umeme ikiwamo kuacha vitendo vya wizi,” alisema.

Alisema mtu yeyote atakayekamatwa katika oparesheni zinaoendelea kufanywa na maofisa wa Shirika hilo atafikiwa katika vyombo vya sheria na kukabiliwa na kifungo cha miaka mitano jela au kulipa faini kubwa.

“Tunaendelea na oparesheni maeneo mbalimbali ili kuwakamata wale wote wasiowaaminifu ambao kila wakati wamekuwa wakihujumu miundombinu ya shirika na hivyo kulisababishia hasara,”

“Mbali na elimu hiyo tunawapatia pia elimu ya namna gani wanaweza kutumia Mita zetu ambazo ni tofauti zinatumia Remote hivyo bila kuwapatia elimu hii inaweza kuwa taabu kwao kuzitumia,” alisema John

Kwa upande wake Afisa Uhusiano wa TANESCO Mkoa wa Arusha, Said Mremi awaliwahimiza wananchi kutembelea kwenye banda hilo ili waweze kupata maelezo yote kuhusu namna bora ya kuunganishiwa umeme.

“Wananchi wakifike viwanja hivi waje hapa TANESCO kwani bado elimu inahitajika kwao wajue hatua wanazotakiwa kufuata kabla ya kufungiwa umeme, wenye umeme wakipita watapata elimu pia,” alisema Mremi.

Naye mkazi wa Kijiji cha Kwapole wilayani Arumeru mkoani Arusha Lazaro Mbisse alisema, amefanikiwa kupata maelezo ya kutosha kabla hajaingiza umeme kwenye nyumba yake mpya.

“Huko mitaani wamejaa mafundi vishoka wanatapeli wananachi wakiwaaminisha wao ndio wafanyakazi wa TANESCO kumbe si kweli, nimefika hapa nimepewa maelezo kamili ya kufunga umeme ndani kwangu.