WANANCHI WATAKIWA KUCHANGAMKIA FURSA ZA UWEKEZAJI WA KAMPUNI YA MWIBA HOLDING

Mmoja wa Wakurugenzi Kampuni ya Mwiba Holdings, Abdukadir Mohammed akielezea mipango ya uwekezaji wa kampuni hiyo wilayani Meatu mbele ya wajumbe wa Kamati ya Ulinzi na Usalama Mkoa Manyara waliopotembelea  kampuni hiyo.

WANANCHI wa Mkoa wa Simiyu, Arusha, Mara, Shinyanga na Mwanza wametakiwa kuchangamkia fursa zinazotokana na uwekezaji unaofanywa na Kampuni ya Kitalii ya Mwiba Holding Ltd katika Pori la Akiba Maswa.

Mpaka sasa Taasisi ya Friedkin Conservation Fund (FCF), inayoendesha Kampuni za Mwiba Holding, Tanzania Game Trackers Safaris(TGTS) na Wingert  Safaris imewekeza zaidi ya Sh Bilioni 670 katika maeneo tofauti ya kitalii nchini.

Akizungumza kwa niaba ya Wakurugenzi wenzake Abdulkadir Mohamed alisema mbali ya uwekezaji huo, wanatarajia pia kuongeza uwekezaji wa kiasi cha Sh bilioni 227 katika kipindi cha mwaka huu

"Tunatarajia kuongeza uwekezaji ila tunachoomba mazingira bora ya uwekezaji kuondolewe migogoro katika maeneo tuliyowekezaji. Lakini pia suala zima la uvamizi wa mifugo na kama kutakuwa na upungufu wa jambo loloye ni vyema tukaelezwa,"alisema Mohamed.

Kwa upande wake Mkuu wa Mkoa wa Simiyu Anthony Mtaka akiwa kwenye ziara na Wajumbe wa Kamati ya ulinzi na usalama ya Mkoa wa Simiyu na Kamati ya Siasa ya CCM mkoa na wilaya ya Meatu alisema, uwekezaji uliofanywa na kampuni hiyo umekuwa na faida zaidi kwa wananchi na taifa kwa ujumla.

“Mwiba Holding wamekeza eneo la Hifadhi ya Jamii ya wanyamapori(WMA) ya Makao na eneo la Ranchi Kijiji cha Makao, wanatoa Sh milioni 610 kwa vijiji saba vinavyozunguka hifadhi kila mwaka, wanachangia misaada na kutoa kutoa ajira,”

“Kampuni hiyo, pia inachangia shughuli za maendeleo na hivi karibuni, imetoa saruji mifugo 3000, mabati 1000 na zaidi ya Sh milioni 115 kwa ajili ya kuchangia mfuko wa elimu wa mkoa wa Simiyu,” alisema Mtaka.

Naye Mwenyekiti wa Chama cha wafugaji Taifa, Jackson Yuma alitaka uongozi wa serikali kutokubali eneo la makao liharibiwe kwa kuruhusu mifugo kuingia ndani ya hifadhi hiyo.

Yuma ambaye pia ni Mwenyekiti wa Jumuiya ya wazazi wa CCM mkoa wa Simiyu, alitaka serikali kwa kushirikiana na wawekezaji kuhakikisha maeneo yaliyotengwa kwa ajili ya uhifadhi yanatunzwa kwa gharama zote kwa faida ya sasa na vizazi vijavyo.

Aidha, Mkuu wa wilaya ya Meatu, Dk. Joseph Chilongani alisema wilaya hiyo imeanza kunufaika na wawekezaji wa sekta ya utalii hivyo aliomba migogoro isiyo ya lazima itatuliwa haraka.