SIKU YA UTALII DUNIANI YAFANYIKA ENEO LA CHIMBUKO LA BINADAMU

-NGORONGORO

MAMLAKA ya Hifadhi ya Ngorongoro, imeadhimisha siku ya Utalii Duniani katika Makumbusho kubwa Afrika, Olduvai Gorge, inayoelezea historia ya chimbuko la binadamu wa kale hadi sasa.

Mhifadhi kutoka Makumbusho ya Taifa jijini Dar es Salaam, Dk Agnes Gidna, alisema mabadiliko ya binadamu bado yanaendelea na kwamba dalili zimeanza kuonekana.

“Tunaendelea kubadilika lakini hatuwezi kuona kwa sasa…mazingira yetu yanasababisha kwa mfano kupungua meno kutokana na chakula tunachotafuna tofauti ilivyokuwa kwa binadamu wa kale,” alisema.

Katika maadhimisho hayo yalifanyika Olduvai Gorge jana, yalikuwa na lengo la kuelimisha wananchi kuhusu chimbuko la binadamu na maendeleo yake.

Alisema walipata nafasi ya kuonyesha mabaki ya kale ya zamadamu yaliyopatikana eneo hilo zaidi ya miaka milioni 3.7.

Alisema makumbusho hiyo imejengwa n kupangiliwa katika hatua nne za uhifadhi wa masalia ya kale ambazo ni sehemu inayohifadhi masalia yaliyopatikana bonde la Laetoli zaidi ya miaka milioni 3.7.

Alisema waliwaonyesha baadhi ya wananchi na watalii mabaki ya mifupa, mafuvu, zana za mawe na nyayo za zamadamu na wanyama waliokuwa tangu wakati huo.

Aidha walionyesha nakala za masalia ya zamadamu kutoka Ethiopia, Kenya na Afrika Kusini kwa lengo la kuelezea jinsi walivyokwa wakifafana na wa hapa.

“Tulichukua nakala za masalia hayo ili kukamilisha historia kamili ya maendeleo ya binadamu ili kutoa elimu kwa wananchi,” alisema.

Katika sehemu ya pili, alisema imehifadhi masalia yaliyopatikana katika bonde la Olduvai miaka zaidi ya milioni 2 iliyopita kama vile mimea, wanyama na binadamu na jinsi walivyokuwa wakiishi kwa pamoja na aina ya chakula walichokuwa wakila.

Alisema ipo pia sehemu inayohifadhi zana za mawe walizokuwa wakitumia na aina ya chakula walichokuwa wakila, zaidi ya miaka milioni moja iliyopita.

Sehemu ya mwisho ni ile inayoonyesha masalia ya binadamu wa sasa zaidi ya miaka laki saba iliyopita.

Baadhi ya binadamu waliokuwa wakiishi eneo hilo walitajwa kuwa ni jamii za Wadatoga, Wahadzabe (hawa mpaka sasa wanaendelea kuokota matunda, kurina asali na kuwinda ili kujipatia chakula) na Wamasai.

Alisema Wadatoga ndio wanaoaminika awali kuishi katika bonde hilo wakifuatiwa na Wahadzabe na sasa Wamasai.

Alisema sehemu hii ndiyo inayoonyesha uhusiano wa karibu kati ya babu na binadamu wa sasa.

Alisema makumbusho hiyo ni ya pekee kwa sababu kila mfupa (masalia) uliopo unaonyeshwa na picha ya huyo binadamu au mnyama hivyo kuwa rahisi kumwelewesha mtu wa kawaida.

Alisema lengo pia ni kuwekeza kwa wanafunzi ili walimu waweza kufika hapo na kujifunza maendeleo ya binadamu ambayo bado yanaendelea.

Kwa upande wake, Kaimu Meneja Uhusiano wa NCAA, Joyce Mgaya, alisema, jana ilikuwa Siku ya Utalii Duniani, ambapo walitambulisha na kujulisha umma kuhusu makumbusho hiyo ya kisasa kabisa Afrika.

“Makumbusho hii imeongeza thamani ya utalii kutokana na masalia yanayoonyesha historia ya chimbuko na maendeleo ya binadamu yanayopatikana eneo hili,” alisema.

Aliwataka wanafunzi, watafiti na wananchi kwa ujumla kupenda kutembelea makumbusho hiyo na kujifunza.

MWISHO