WATANZANIA WANAKULA NYAMA KIDOGO SANA

Tanzania inakabiliwa na changamoto ya  Kiwango cha ulaji mdogo  wa nyama kutokana na bei kuwa kubwa ambapo kwa kipindi cha mwaka 2012/13 hadi 2016/17 ulaji wa nyama umeendelea kuwa kilo 12 kwa mtu Kwa mwaka. 

Ambapo kiwango hicho kimeongezeka kidogo kwa mwaka 2015/16 na kufikia kilo 15 kwa mtu Kwa mwaka, huku Kiwango hiki kikiwa ni kidogo Sana ikilinganishwa na kiasi kinachoshauriwa na shirika la chakula na kilimo (FAO)  kwa kilo 50 kwa mtu Kwa mwaka. 

Hayo yalisemwa  jana kwenye maonyesho ya nanenane ,Afisa usajili mifugo toka bodi ya nyama Tanzania, Ezekiel Maro wakati akizungumzia hali halisi ya ulaji nyama hapa nchini. 

Aidha alisema kuwa, changamoto hiyo inachangiwa na gharama za mifugo kuwa juu zisizoendana na gharama za uzalishaji hivyo kupelekea watumiaji kutumia mboga  nyingine. 

Maro alisema kuwa, changamoto nyingine inayochangia ulaji kuwa chini ni kutokana na wananchi wengi kutokuwa na elimu ya kutosha juu ya faida za ulaji nyama. 

"kwa kweli tunahitaji kuongeza kiwango cha uzalishaji wa nyama na ili wananchi waweze kula nyama kwa wingi tunashauri wafanyabiashara wa nyama kutumia mizani ya kidigitali ili kuwawezesha walaji kuwa wengi zaidi kutokana na mtu kupimiwa nyama kulingana na hela aliyonayo. "alisema Maro.

Naye Afisa nyama kutoka bodi hiyo, Edgar Mamboi alisema kuwa, katika kipindi cha mwaka 2012 /2013 hadi 2015/2016 kiwango cha uzalishaji wa nyama nchini kimekuwa kikiongezeka kwa wastani wa asilimia 0.85 huku  kwa mwaka 2016/2017 kiwango kikiongeza kwa takriban tani 69 .

Mamboi alisema kuwa, kushuka kwa uzalishaji hususani nyama ya mbuzi, kondoo, kuku na nguruwe kumetokana na uhaba wa vyakula vya mifugo. 

Alisema kuwa, wanaendelea na kampeni ya kuhakikisha wananchi wanakula nyama safi na salama huku wakiendelea kutoa elimu kwa wafanyabiashara wa nyama kuweka magogo ya plastiki au mashine maalumu kwa ajili Aha kukatia nyama sehemu salama zaidi. 

Kwa upande wa baadhi ya Wateja wakizungumzia kuhusiana na swala la wafanyabiashara wa nyama kukata kwenye magogo waliwaomba kupitishwa sheria maalumu ya kuwabana ili waweze kukatia kwenye vifaa vinavyotakiwa kwa usalama wa afya zao pia.