RAIA WA KENYA: TULISUBIRI KWA HAMU KUPIGA KURA TUKIWA NJE YA NCHI

Raia wa Kenya Evans Okello akipiga kura katika kituo kilichokuwa ukumbi wa Halmashauri ya Jiji la Arusha nchini Tanzania hivi

AGOSTI 8, Mwaka huu raia wa Kenya takribani milioni 19 waliojiandikisha kupiga kura kuchagua viongozi watakaowaongoza kwa miaka mingine mitano ijayo, huenda wakajitokeza kwa idadi hiyo kutimiza haki yao ya kikatiba.

Wagombea katika Uchaguzi Mkuu huo wa wanaopewa nafasi ya kuchaguliwa ni Rais Uhuru Kenyata anayemaliza muda wake kupitia Chama cha Jubilee, Raila Odinga kupitia muungano wa upinzani (National Super Alliance –NASA).Wengine ni Cyrus Jirongo (UDP), Dk. Ekuru Aukot kutoka Third way Alliance, Abduba Dida (ARC) na wagombea huru Joseph Nyagah, Profesa Michael Wainaina na Dk. Japheti Kaviga.

Kenya moja ya kati ya nchi Sita wanachama wa Jumuiya ya Afrika Mashariki (EAC), inatajwa kuwa imara zaidi katika uchumi ikilinganishwa na nchi nyingine wanachama zilizopo ukanda huo.

Licha ya uchumi imara, nchi hiyo imetajwa kupiga hatua zaidi katika masuala ya demokrasia ambapo uchaguzi wa mwaka huu mbali ya kutoa fursa hiyo kwa raia walio Kenya, imekwenda na kutoa haki ya kupiga kura kwa raia wanaoishi nje ya nchi.

Lakini kama haki hiyo ya kidemokrasia imepanuka zaidi kwa kwa kutoa fursa kwa wafungwa nchini humo kutumia haki ya kikatiba kuchagua viongozi wanaowataka wakiwa ndani ya magereza tofauti na baadhi ya nchi za Afrika Mashariki.

Kama ilivyokuwa kwa raia waishio nchini Kenya kujitokeza kupiga kura za kuchagua viongozi wao jana, ndivyo ilivyokuwa pia mkoani Arusha Kaskazini mwa Tanzania ambapo kulikuwa na kituo cha kupigia kura kwa watu waishio na kufanya kazi nje ya Kenya.

Saa 12 asubuhi kama zilivyo taratibu za upigaji kura kituo cha kupigia kura kwa raia wa Kenya waishio mjini Arusha na maeneo jirani kilifunguliwa katika ukumbi wa mikutano wa Halmashauri ya Jiji la Arusha.

Kutokana na madhari ya kituo hicho kuwa ya kiusalama zaidi wapiga kura wenye sifa ya kupiga kura katika kituo hicho wanaokadiriwa kufikia 370 walikuwa wakijitokeza katika eneo hilo kwa makundi huku wengine wakiwasili kwa magari yao.

Kwa kadiri muda ulivyokuwa ukisonga ndivyo idadi yao ilikuwa ikiongezeka na hata kwa wakati mwingine kujikuta wakilazimika kupanga foleni ya kuanzia watu Tisa hadi 10. Hatua iliyoonyesha ni kwa jinsi gani raia hao wamehamasika kupiga kura.

Usalama wa eneo hilo ulikuwa umeimarishwa kutokana na kuwapo askari polisi walioimarisha doria ndani ya ukumbi pamoja na nje huku baadhi yao wakitoa maelekezo kwa wapiga kura kufuata taratibu za kupanga foleni na kusimama eneo sahihi kabla ya kwenda kupiga kura.

Akizungumza na MTANZANIA mjini hapa jana Afisa Msimamizi wa Kituo hicho kutoka Tume ya Taifa ya Uchaguzi na Mipaka (IEBC), Patrick Nyakira anasema tangu kufungulia kwa kituo hicho upigaji wa kura ulikuwa katika hali ya utulivu na usalama.

Nyakira anasema, kituo hicho kilifunguliwa Saa 12 asubuhi na wanatarajia kukifunga Saa 11 jioni ambapo kwa wapiga kura wote watakaokuwa kwenye foleni wataendelea kuhudumiwa.

“Wapiga kura wanaendelea kujitokeza kama unavyoona wamepanga foleni. Na hadi kufikia Saa 5 asubuhi tayari wapiga kura zaidi ya 100 walikuwa tayari wamepiga kura zao ikiwa ni sawa na asilimia asilimia 33.Tunatarajia wapiga kura wengi watajitokeza kwa kadri muda unavyokwenda,” anasema Nyakira.

Kwa upande wake mpiga kura raia wa Kenya anayeishi nchini Sista Jane Waithira kutoka Shirika la Masista wa Mary Emmaculate- Burka Jimbo Kuu la Arusha yeye ameipongeza Serikali ya Kenya kwa kutoa fursa ya kupiga kura kwa raia waliopo nje ya nchi.

Sista Waithira anasema, fursa hiyo ya kupiga kura akiwa nje ya Kenya ameisubiria kwa miaka mingi na hivyo kwa mwaka huu amefurahia kutimiza ndogo yake ya kuchagua kiongozi akiwa nje ya nchi.

“Nimefarijika sana kupiga kura nikiwa nje ya nyumbani, fursa hii tuliingojea kwa miaka mingi hatimaye imewadia na imenipa haki ya kuchagua kiongozi kwani vurugu zilizotokea mwaka 2007 kwa hakika hazikuwa na afya kwa nchi yetu,”anasema Sista Waithira.

Kituo hicho kilichopo ukumbi wa Jiji la Arusha ni sehemu ya vituo 40,883 vya kupigia kura vilivyo sajiriwa na Tume ya Uchaguzi ambapo kwa wapiga waliopo nje ya nchi wao watashiriki kupiga kura ya rais peke yake.

Kwa raia waliopo nchini Kenya wamepiga kura ya kuchagua Magavana wa Kaunti, Wabunge, Maseneta wawakilishi wa Wanawake na Wawakilishi wa Wadi.