WAFUGAJI JAMII YA KIMAASAI TARAFA YA LOLIONDO NGORONGORO WAONDOLEWA NDANI NA MPAKANI MWA HIFADHI YA TAIFA SERENGETI

Mkazi wa Kata ya Ololosokwan, Tarafa ya Loliondo wilayani Ngorongoro mkoani Arusha akiwa ameshika mlango wa nyumba yake baada ya nyumba hiyo kuchomwa na kutakiwa kuondoka kwenye maeneo ndani na mpakani mwa hifadhi ya Taifa ya Serengeti na Pori la Akiba la Loliondo.

Baadhi ya wananchi wa Kata ya Ololosokwan wilayani Ngorongoro wakiwa na mizigo yao tayari kwa kuondoka maeneo ya ndani na mpakani mwa Hifadhi ya Taifa ya Serengeti, hii ni kufuatia Oparesheni inayoendeshwa na Serikali ya kuwaondoa wananchi wote kwenye maeneo hayo.

Sehemu ya makazi ya Boma la mmoja wa wananchi wanaoishi katika Kata ya Ololosokwan wilayani Ngorongoro mkoani Arusha ikiwa imechomwa moto tayari.

Diwani wa Kata ya Ololosokwan wilayani Ngorongoro Yannick Ndoinyo akielezea namna nyumba hizo zilivyochomwa.

SERIKALI imeziondoa kwa nguvu zaidi ya kaya 25 za wafugaji waliokuwa wakiishi ndani na wengine mpakani mwa Hifadhi ya Taifa ya Serengeti na Pori Tengefu la Loliondo.  

Kutekelezwa kwa Oparesheni hiyo iliyoanza Agosti 12, Mwaka huu ikiwa tayari ilishatangazwa kumewaibua viongozi wa wananchi katika Tarafa ya Loliondo, wilayani humo wakidai kutoridhishwa na zoezi hilo.

Wakizungumza kwa nyakati tofauti jana juu ya oparesheni hiyo, Diwani wa Kata ya Ololosokwani Yannick Ndoinyo alidai kuwa katika Kata yake oparesheni hiyo imechoma maboma ya kudumu matano yenye kaya 12.

Ndoinyo alidai kwamba tangu kuondolewa kwa kaya hizo kumesababisha hasara kubwa kwani hawajui watu hao wameelekea wapi wakiwamo watoto na mifugo yao.

“Ukichoma nyumba ya mtu pekee hiyo ni hasara, lakini pia ukimsababishia hasara ya maisha yake nayo ni hasara, wale watu wana mifugo wana watoto hatujui wapo wapi,” alidai Diwani Ndoinyo na kuongeza:

“Tukio kama hili ni la pili kufanyika mwaka 2009 lilifanyika kwa askari kuchoma maboma kama hivi lakini baadaye serikali ilikana kuhusika kwa hiyo hata hili naamini si jambo la Serikali,” alidai.

Kwa upande wake Mwenyekiti wa Halmashauri ya wilaya ya Ngorongoro ambaye pia ni Diwani wa Kata ya Arashi Mathew Siloma alidai katika eneo lake yamechomwa zaidi ya maboma 19 ya wananchi.

Filoma alidai kwamba oparesheni hiyo imefanyika katika katika ardhi ya vijiji vilivyoko nje ya Hifadhi ya Taifa ya Serengeti.

“Tumepokea kwa mstuko mkubwa kuhusu oparehseni inayoendelea kutokana na kuwapo kwa mgogoro mkubwa wa eneo la Kilometa 1,500, bado maamuzi yake yalikuwa hajatoka kwa Waziri Mkuu.

“Juzi Agosti 12, Mwaka huu tumeona oparesheni ikichoma maboma kimsingi hatupingi zoezi la kuondoa mifugo ndani ya hifadhi ya Serengeti.

Lakini kuchoma makazi ya wananchi kwenye ardhi ya kijiji hili halikubaliki. Jambo hili linafanywa kwa usiri kubwa, tunafuatilia kujua kiini cha oparesheni hii kama kweli ni zile Kilometa 1,500.

“Maeneo ya Ololosokwan, Arash wamechoma maboma yaliyoko nje ya hifadhi zaidi ya Kilomita 3 kwingine mpaka 12 ni maeneo ya wananchi wameyatumia kwa miaka mingi kwa malisho na kupata maji,” alidai Filoma.

Kwa mujibu wa barua ya Mkuu wa wilaya ya Ngorongoro Rashid Taka ya Agosti 5, Mwaka huu kwenda kwa maofisa watendaji Kata na Vijiji, Kata za Piyaya, Arash, Maalon, Oleipiri, Soitsambu, Lorien na Ololosokwan kuwajulisha wananchi wao waliojitwalia maeneo ya kuishi ndani ya Hifadhi ya Serengeti na mpakani mwa Pori Tengefu la Loliondo kuondoka kwenye maeneo hayo na mifugo yao ifikapo Agosti 10, Mwaka huu.

Barua hiyo ilizitaja hatua kali zitakazochukuliwa baada ya muda huo kumalizika kuwa ni pamoja na kuwaondoa kwa nguvu wale wote waliokaidi ambapo Kamati ya ulinzi na usalama itakayofanya kazi na kamati ya ulinzi na usalama ya wilaya ya Serengeti na kikosi maalumu kutoka SENEPA na NCA.

“Wale wote watakaokutwa wakiwa ndani ya hifadhi ya Serengeti watakamatwa na kufikishwa kwenye vyombo vya sheria ikiwamo kushitakiwa mahakamani.

“Wale watakaokutwa wakiwa bado wamejenga au kukaa mpakani kabisa mwa hifadhi ya Serengeti kwenye (LGCA), wataondolewa kwa nguvu na kurudishwa kwenye vijiji vyao yalikotengwa maeneo ya kuishi,” ilisema barua hiyo iliyosainiwa na Dc Taka.