PARACHICHI FURSA MPYA NJOMBE

*Soko lahitajika tani milioni 4.5

 FURSA mpya ya kilimo cha matunda aina ya Parachichi katika Mkoa wa Njombe, imetajwa kujificha kwenye mwinuko wa kati ya Mita 1,700 hadi 2,400 kutoka usawa wa bahari.

Mwinuko huo wa kipekee ndio unalifanya eneo la mkoa huo kuwa la kipekee katika uzalishaji mkubwa wa Parachichi katika msimu ambao, maeneo mengi duniani zikiwamo nchi za Peru na Mexico zinakuwa na kiwango kidogo cha uzalishaji wa tunda hilo katika soko la dunia.

Hali hiyo ya hewa imewezesha utekelezaji mzuri na kutoka mazingira rafiki ya ulimaji hasa kupungua kwa gharama za umwagiliaji kwani ardhi yake hubakia nyevunyevu kwa muda wa kutosha kutokana na uwapo wa mvua kwa kipindi kirefu cha mwaka.

Kilimo cha Parachichi mkoani Njombe kwa sasa kinatajwa kuwa ndio fursa mpya pekee inayoweza kumtengenezea faida kubwa mkulima endapo tu atakuwa amefuata kanini na maelekezo ya kupanda miche kisasa shambani mwake.

Wananchi mkoani humo kwa mingi wamejishughuli na ulimaji mazao mbalimbali na kupandaji miti kwa ajili mbao. Lakini ujio wa kilimo hicho cha Parachichi ambacho si maarufu sana sasa utafungua ukurasa mpya kwa wananchi kujiletea maendeleo zaidi.

Kikiwa ni kilimo ambacho bado hakijapata umaarufu sana mkoani humo kwa sasa, sasa ni takribani miaka miwili tu imepita tayari wakulima wachache wameanza kuonyesha kupata mafanikio ya kulima parachichi.

Hamasa miongoni mwa wananchi imeshamiri miyoni mwao na kuwasukuma kulima parachichi ambapo Serikali kwa kushirikiana na wadau wakipigana kuongeza juhudi za kusaidia utekelezaji wa kilimo hicho ambacho soko lake linahitaji tani zaidi ya milioni 4.5 kila mwaka.

Ili kukamilisha fursa hiyo kwa wana Njombe, ni wazi kwamba Idara ya kilimo mkoani humo kwa kushirikiana na Asasi Kilele inayoendeleza kilimo cha bustani za mbogamboga, matunda na maua (TAHA), wameendelea kuwasaidia wakulima wa zao hilo kuhakikisha wanafikia mafanikio.

Katika jukumu hilo wamekuwa wakitoa huduma za kitaalamu kwa vikundi vya wakulima namna ya kulima kilimo cha kisasa cha parachichi kitakachowezesha wazalishe zaidi na kukidhi haja ya soko, kwani wakulima hao wanazalisha tani 600 hadi 800 pekee, wakati soko likihitaji tani milioni 4.5.

Afisa Kilimo kitengo cha mazao wa halmashauri ya Njombe Nolasco Kilumile anasema, mbali ya kushauri wananchi walime mazao mengine, bado wameendelea kuwashauri kama watalaamu kulima zaidi parachichi kwani linawapatia fedha kwenye msimu ambao kunakuwa hakuna tunda hilo maeneo mengine.

“Tunawashauri wachague mnyororo wa dhamani unaofanya vizuri, lakini sisi tunamewaambia parachichi linafanya vizuri zaidi, tungependa wakulima wengi waingie kwenye kilimo hiki

Kwa upande wake Bwana shamba wa TAHA Damas Kisalala yeye anasema, mahitaji kwa wakulima yameanza kuwa makubwa hivyo wamelazimika kuanzisha bustani kwa ajili ya kutoa miche bora kupitia aina ya mbegu bora ya hasi.

“Tunazalisha mbegu hii ya hasi kwasababu ina fursa nzuri ya kibiashara sokoni ambayo mahitaji yake ni makubwa na kwa Njombe peke yake zipo kampuni kubwa zinazohitaji zaidi ya Tani Milioni 1 kwa mwaka,” anasema Kisalala.

Tofauti ya muda wa uvunaji ni moja ya faida inayotoa uhakika wa soko la Parachichi kutoka mkoani Njombe ambapo Kisalala anasema, nchi kama Mexico na Peru mavuno yao ya Parachichi yamekuwa yakiingia sokoni kuanzia Februari, Machi hadi Aprili.

“Kwa hiyo kuanzia Mei, Juni, Julai hadi Agosti kila mwaka Njombe pekee ndio huwa inalisha matunda ya Parachichi katika soko la dunia kwani kwingine kote uzalishaji wake huwa wa chini wakati huku ukiwa juu.”

“Hata tukizalisha tani milioni 1 tuna uhakika kabisa wa kuuza matunda yetu sokoni,” anasema Kisalala.

Naye Mkulima wa Parachichi kutoka Kijiji cha Itulike mkoani Njombe Erasto Ngole anazitaja faida alizozipata kutokana na kilimo hicho cha parachichi katika maisha yake.

Anasema, mwaka wa 2017 amekuwa akiendelea kuzingatia maelekezo kuanzia katika kilimo hicho kwani mpaka sasa tayari amefanikiwa kuvuna kiasi cha tani 13 za Parachichi kutoka shambani kwake.

Katika mavuno ya kwanza Ngole anasema alipata Sh. Milioni 16.8 zilizomuwezesha kujenga nyumba ya kisasa kununua gari pamoja na kuendelea kuboresha shamba lake.