WAZIRI MAGHEMBE AGEUKA "MBOGO" BODI YA NGORONGORO

Na MWANDISHI WETU

-ARUSHA

WAZIRI wa Maliasili na Utalii Professa Jumanne Maghembe amesema Bodi mpya ya Mamlaka ya Hifadhi ya Ngorongoro (NCAA), imeteuliwa kuendesha shirika la Serikali ya Jamhuri ya Muungano wa Tanzania na si ubia kati ya wananchi wenyeji na Serikali.

Kauli hiyo aliitoa mjini hapa jana mara baada ya kuzungumza na wajumbe wapya wa bodi hiyo ambayo imekuwa tofauti na bodi zilizopita zilizokuwa zikijumuisha pia wajumbe kutoka Baraza la Wafugaji kutoka Tarafa ya Ngorongoro.

Alisema uteuzi wa wajumbe wa bodi hiyo uliangalia maslahi mapana ya Serikali ikiwamo utekelezaji wa kazi zilizopo katika eneo hilo linaloiingia Taifa fedha nyingi za kigeni kwa ajili ya manufaa ya wananchi wote.

“Katika kuangalia wajumbe hakuna mahali pamesema wajumbe kutoka kwa Wasukuma au Wangoni, imeangalia maslahi mapana ya nchi. Uteuzi huu umefanywa kutekeleza kauli mbiu ya Hapa Kazi Tu,” alisema Waziri Maghembe na kuongeza:

“Bodi hii si ya ubia kati ya Serikali na wananchi wanaoishi ndani ya Mamlaka ya Ngorongoro imeteuliwa kuendesha shirika.Bodi haiwezi kutengenezwa kwa mazoezi kwamba lazima iwe na wajumbe kutoka Baraza la wafugaji hapana,” alisema.

Waziri Maghembe awataka wajumbe wa bodi hiyo kutambua majukumu yao kuwa ni kutekeleza mlengo ya Mamlaka ya Hifadhi ya Ngorongoro, ambayo ni kuhifadhi kuhamasisha utalii wa nje na ndani na kuangalia huduma kwa wananchi wanaoishi ndani ya eneo hilo kisheria.

“Hayo ndio mambo muhimu nimewasisitizia wahakikishe yanatekelezwa, zipo changamoto kama ongezeko la watu na mifugo ndani ya Mamlaka, ambazo kwa sasa hatua kubwa za makusudi zinaendelea kuchukuliwa kukabiliana nazo.

“Nimeagiza wahakikishe hatua za makusudi za kuzuia uhamiaji wa watu wengine ndani ya eneo la hifadhi pamoja na ongezeko la mifugo ambapo kwasasa tunaendelea na sensa ya watu na mifugo kuweka alama ili kujua ni mifugo ya nani ina kaa wapilengo ni kusaidia kuendeleza uhifadhi na kujua idadi kamili ya mifugo,” alisema.

Akizungumzia kuhusu baadhi ya wananchi wanaoishi katika maeneo ya hifadhi Prof. Maghembe alisema, hatua zinazochukuliwa kwa sasa ni kuondoka wenyewe kwa hiari kwenye maeneo hayo pamoja na mifugo yao.

“Naagiza watu hao waondoke mara moja kitakachofuata ni kuondolewa kwa maboma yao na mifugo pamoja na kuwapeleka mahakamani. Kwani hivi sasa kuna watu wanaingia na kutoka wakijifinya na wao ni wenyeweji tunataka kufahamu wenyeji na kuijua mifugo yao.  

Alisema awali ndani ya eneo hilo la Mamlaka ya Hifadhai ya Ngorongoro kulikuwa na wenyeji wasioupungua 9,000 lakini kwasasa idadi hiyo imeongeza na kufikia takribani watu 100,000 wanaoishi na mifugo yao ndani ya Mamlaka.

Akifafanua kuhusu kuwapo kwa taarifa za kulipuka kwa Mlima Oldonyolengai uliopo ndani ya eneo hilo Waziri Maghembe aliwataka wananchi kutokuwa na wasiwasi wowote kwa sasa kwani Serikali ipo na itaendelea kutoa taarifa kwa kila hatua.

“Tunaomba Mungu kulipuka kwake isiwe mbaya sana tunaendelea kufuatilia kwa karibu bado hatujajua mlipuko wake utakuwa mkubwa kiasi gani. Tukishafahamu tutawashauri wananchi wajiandae kuondoka eneo hilo.

“Kwasasa wasiwe na wasiwasi, kwani mlipuko wake bado hatujajua utakuwa mkubwa kiasia gani baada ya vipimo vya Jiolojia vinavyoendelea kufanyiwa uchunguzi tutawaambia wananchi.

“Kazi ya Jiolojia inafanyika muda wote, ndio maana tulisema utalipuka ila kiasi gani itatoka, aina gani kwa maana ya moto, vumbi au ujiuji bado hatutajua. Lakini wananchi waendelee na shughuli zao,” alisema Waziri Maghembe.

Kwa upande wake Kaimu Mwenyekiti wa Bodi ya NCAA Mudhihiri Mudhihiri alisema, wamejipanga kutekeleza yale yote waliyokabidhiwa na kuaminiwa na Serikali.

“Tumejipanga kuongeza nguvu mpya mimi na wajumbe wangu mahiri tuliochaguliwa mchanganyiko wa watu hawa umenitia matumaini kuwa tutafanya kazi vizuri,” alisema Mudhihiri.

Mwisho.