TANAPA YACHANGIA BILIONI 61 MFUKO MKUU WA SERIKALI

Na MWANDISHI WETU

-ARUSHA

SHIRIKA la Hifadhi za Taifa (TANAPA), katika kipindi cha miaka miwili ya fedha limeweza kuchangia kiasi kisichopungua Sh.Bilioni 61 katika Mfuko Mkuu wa Serikali.

Fedha hizo ni sawa na ongezeko la Sh. Bilioni 7, ambapo Mwaka 2015-2016 zilichangwa kiasi cha Sh. Bilioni 27 huku Mwaka 2016 -2017 zikichangwa Sh. Bilioni 34.

Akihojiwa katika kipindi cha “TUNATEKELEZA” kilichorushwa na Televisheni ya Taifa (TBC) juzi, Mkurugenzi Mkuu wa Hifadhi za Taifa (TANAPA), Allan Kijazi alisema mafanikio hayo yalitokana na ongezeko la watalii nchini.

Alisema utalii umeendelea kukua kila mwaka kwa ongezeko la asilimia 4 mpaka 7 na kusababisha mchango katika hifadhi za taifa zinazosimamiwa na Shirika lisilotegemea ruzuku kutoka serikalini kuendelea kuongezeka kila mwaka, huku asilimia 80 ya utalii ukitokana na hifadhi za taifa.

“TANAPA tunajitegemea kwa asilimia 100 bila kutegemea ruzuku kutoka serikalini, hivyo tunatakiwa kuchangia mapato katika mfuko mkuu wa Serikali.

“Kwetu sisi mapato yamekuwa yakiongezeka ndio maana mchango wetu nao unaongezeka, na hasa ikichukuliwa sekta ya utalii inachangia asilimia 17.2 ya pato la taifa na asilimia 25 ya fedha za kigeni zikitokana na utalii,” alisema.

Katika mahojiano hayo Kijazi alizitaja nchi zinaongoza kwa raia wake kutembelea nchini kuwa ni Marekani, Ujerumani, Uingereza, Italia, Ufaransa na Hispani.

Alisema watalii kutoka nchini Marekani wamekuwa wakipendelea kutembelea soko la Tanzania kutokana na nchi kuwa na vivutio vya asili na vya kipekee ukilinganisha na nchi nyingine duniani.

Kuhusu njia wanazotumia kujitangaza alisema awali walikuwa wakitembelea wadau katika masoko wanayoyalenga, ambapo kwa sasa wanatumia zaidi mfumo wa digitali kusambaza taarifa kwa wageni na wadau wanaoonyesha nia ya kutembelea vivutio vilivyopo.

“Tumekuwa tukipeleka taarifa mbalimbali za vivutio vya utalii kwenye ofisi za balozi zetu ili kuwashawishi wateja. Kwa ujumla tunahitaji kuongeza juhudi za kujitangaza zaidi kuliko nyuma katika masoko ya nje ya nchi.

“Teknolojia imetusaidia kujitangaza na kuweka wazi vivutio tulivyonavyo ikiwamo kuondoa uvumi wa propaganda za ushindani wa kibiashara. Hivi sasa idadi kubwa ya watalii kutoka nje wanaelewa Mlima Kilimanjaro upo Tanzania,” alisema Kijazi.

Alisema kwamba kwa sasa wamekamilisha mkakati wa kitaifa unaotaka kuwe na mfuko wa maendeleo ya utalii utakaowezesha vivutio vyote vya utalii nchini kutangazwa kwa pamoja badala ya kila mmoja kutangaza kivyake.

Akielezea kuhusu matukio ya ujandiri Kijazi alisema matukio hayo yamepungua kwa asilimia 80 baada ya mamlaka kushirikiana na Jumuiya za kimataifa kutokomeza soko la bidhaa zitokanazo na ujangiri.

“Ujangiri tumeudhibiti hasa wa wanyama wakubwa kama Tembo na Faru. Hata ukiangalia idadi ya wanyama waliokuwa wakiwindwa kwa inazidi kuongezeka kuzaliana na kuonekana,” alisema Kijazi.

 Mwisho.