TAASISI YATAKA VIJANA KUNG’AMUA FURSA

Na ABRAHAM GWANDU

-ARUSHA.

VIJANA wametakiwa kuongeza thamani na ubunifu wa ziada katika bidhaa wanazotengeneza ili bidhaa hizo ziingie kwenye ushindani na kutumia masoko ya kibiashara yaliyopo katika eneo la Afrika ya Mashariki.

Akizungumza jana katika kongamano lililoshirikisha vijana wapatao elfu moja kutoka wilaya zote za Mkoa wa Arusha ,Mkurugenzi wa taasisi isiyokuwa ya kiserikali ya Foundation For Civil Society Francis Kiwanga alisema soko hilo ni fursa adhimu ambayo vijana wa Tanzania wanapaswa kuichangamkia.

Pamoja na mambo mengine kongamamo hilo pia lilikuwa na lengo la kuwaunganisha vijana hao na wadau mbalimbali kutoka nchi zote sita za EAC ili waweze kujifunza namna ya kuongeza thamani katika bidhaa zao na kuweza  kutumia fursa  zilizopo  kujipatia soko la uhakika ndani na nje ya nchi. 

Kiwanga alisema kongamano hilo ni hitimisho la kampeni maalumu ya kuhamasisha vijana wa nchi za Jumuiya ya Afrika Mashariki kushiriki fursa mbalimbali zilizopo. 

Alisema kuwa, taasisi hiyo imefanya kampeni ya  siku kumi   iliyolenga kuhamasisha vijana kubadilika kifikra na kuachana na maswala ya kuajiriwa ili waweze kutoa mchango mkubwa katika uzalishaji  wa bidhaa zao na hatimaye kupata soko ndani na nje ya nchi. 

Kiwanga alisema kuwa, lengo la kuwakutanisha vijana hao ni kuweza kuzitambua fursa mbalimbali zilizopo katika jumuiya ya Afrika mashariki kwani kama vijana wana nafasi  kubwa ya kushiriki katika soko la jumuiya na kuweza kuinua uchumi wa nchi zetu. 

"Lazima kama vijana tuangalie namna ya kushiriki kikamilifu katika uchumi wa nchi yetu na kuhakikisha tunatoka na kwenda kwa wenzetu wa nchi jirani katika kuinua uchumi wetu kwa kutumia fursa mbalimbali zilizopo "alisema Kiwanga. 

Naye Katibu tawala wa Mkoa wa  Arusha, Richard Kwitega alisema kuwa  umefika wakati sasa wa vijana kufikiria tofauti nje ya boksi na kutumia fursa mbalimbali zilizopo nje ya nchi kwa kuhakikisha wanapata soko la uhakika litakalowawezesha kujikwamua kiuchumi. 

Aliwataka vijana hao kuhakikisha wanawatumia wataalamu waliobobea katika maswala ya kiuchumi na biashara ili kuongeza thamani ya bidhaa zao na hatimaye kuweza kupata soko la uhakika .

Kwa upande wa Mkuu wa Chuo cha Ufundi Arusha, DK  Richard Masika alisema katika kuhakikisha kuwa wanaunga mkono juhudi za vijana kupata ajira  wamekuwa wakiwajengea uwezo vijana wa kitanzania ili waweze kujiajiri kwa kutoa mafunzo mbalimbali ya muda mrefu na muda mfupi ambayo yatawawezesha kupata ajira ndani na nje ya nchi. 

Alisema kuwa, kwa sasa hivi wemeanza kuwaandaa vijana ili waweze kupata ajira katika maswala ya gas ambapo wameanzisha programu ya kuwafanya wahitimu watambulike kimataifa zaidi. 

Mwisho .