TAWLA WAANZISHA JUKWAA LA WANAWAKE MERU

CHAMA Cha Wanasheria Wanawake Tanzania,(Tawla) kwa kushirikiana na Halmashauri ya wilaya ya Meru,wameanzisha jukwaa la wanawake katika halmashauri hiyo,kwa lengo la kuwaandaa na kuwajengea wanawake uwezo wa kujadili masuala mbalimbali yanayowahusu wanawake.

Akizungumza wakati wa uzinduzi wa jukwaa hilo juzi,Mratibu wa dawati la uwezeshaji wananchi kiuchumi katika halmashauri hiyo Saumu Kweka,alisema kuwa jukwaa hilo litawawezesha wanawake kupata sehemu ambayo wataweza kukutana kwa pamoja na kujadiliana masuala yanayowahusu ikiwemo upatikanaji wa haki.

Alisema kuwa jukwaa hilo litawawezesha wanawake kuangalia fursa zilizopo katika maeneo yao ikiwemo fursa za kiuchumi ili waweze kuzitumia kujiongezea kipato.

"Jukwaa hili litawakutanisha wanawake ambapo wataweza kujadiliana masuala mbalimbali yanayowahusu,kuangalia fursa za kiuchumi na tutajitahidi kuwakutanisha wanawake wengi zaidi ili waweze kuchangia katika shughuli za maendeleo,"alisema Saumu.

Aidha Mratibu huyo alitumia fursa hiyo kuwataka wanawake kujiunga kwenye vikundi ili waweze kunufaika na fursa mbalimbali ikiwemo mikopo kutoka kwenye taasisi za fedha pamoja na taasisi nyingine ambazo hutoa mafunzo ya ujasiriamali kwa vikundi vya wanawake.

Awali Mratibj wa Tawla tawi la Arusha,Cecilia Ngaiza,alisema jukwaa hilo litasaidia kupunguza changamoto mbalimbali zinazowakabili wanawake hasa waishio maeneo ya vijijini ikiwemo ukiukwaji wa haki unaochangiwa na mila na desturi potofu.

"Huu ni mradi wa kukuza upatikanaji wa haki ikiwemo ardhi kwa wanawake na unalenga kuanzia ngazi za vijiji,kata,wilaya hadi mkoa lengo likiwa ni kuwasaidia wanawake ili wapate haki zao ambazo wamekuwa wakizikosa kwa muda mrefu kutokana na sababu mbalimbali ikiwemo mila na desturi potofu,"alisema.