TANZANITE ONE,WACHIMBAJI WADOGO WATIBUANA TENA

MGOGORO wa muda mrefu kati ya wachimbaji wadogo wa Tanzanite na kampuni ya Tanzanite One umezuka tena na kusababisha hali usalama migodini hapo kuwa tete.

Habari za jana zilisema mchimbaji mdogo Nembles Mbatia, alifariki dunia jana baada ya kukosa hewa kwa kile kilichodaiwa kuwa kilitokana na kukosa hewa akiwa mgodini.

Kamanda wa Polisi wa Mkoa wa Manyara, (RPC), Francis Massawe, alithibitisha kifo hicho na kusema polisi wanaendelea na uchunguzi kubaini chanzo cha kifo hicho.

“Taarifa zinaonyesha alikosa hewa akiwa mgodini, lakini tunachunguza. Uchunguzi wa awali haujaonyesha kama marehemu alikuwa na majereha,” alisema.

Katika tukio lililotokea Ijumaa iliyopita, wachimbaji wawili wadogo walijeruhiwa macho na kulazwa Hospitali ya Rufaa ya KCMC ya mjini Moshi na mwingine Kituo cha Afya cha Mirerani, wakipata matibabu.

Akizungumzia tukio hilo, Meneja Mkuu wa mgodi wa Gem & Rock Venture, Joel Saitoti Mollel, alisema tukio hilo lilitokea majira ya saa 10 alasiri na saa 4 usiku ya Ijumaa iliyopita.

“Jana (Ijumaa) saa 4 usiku baadhi ya walinzi wa Tanzanite One walipita katika mitoboano na kuingia katika mgodi wangu na kupiga mabomu ya machozi.

“Katika tukio hilo vijana 10 waliumia, hata sasa wamepiga tena na mmoja ameumia.

Hali hii inatokea kila wakati tunapokaribia kupata vito, (maarufu kama mawe) hawa wenzetu wakiona hivyo hufanya ‘mitobozano’ na kuingia upande wetu na kupiga mabomu ya machozi wakidai ni eneo lao,” alisema.

Kufuatia hali hiyo, wachimbaji hao wamemuomba Rais John Magufuli, ambaye anawajali wanyonge kuingilia kati na kuwanusuru dhidi ya unyanyasaji wanaofanyiwa.

Aidha walimuomba Rais Magufuli kutembelea Mirerani na kusikia mwenyewe kero wanazopata.

Vurugu hizo, zilimuibua RPC wa Mkoa wa Manyara, Massawe, kutoka Babati hadi Mirerani kukutana na wawakilishi wa pande mbili hizo katika mkutano uliofanyika Kituo cha Polisi Mirerani juzi.

Akizungumza na waandishi wa habari baada ya kikao hicho, Kamanda Massawe, alisema ametoa amri kusitisha uchimbaji wa vito katika eneo wanalogombea hadi muafaka utakapofikiwa kati yao na Wizara ya Nishati na Madini.

“Mgogoro huu ni wa muda mrefu, usipochukuliwa hatua za haraka unaweza kuleta madhara makubwa,” alisema na kuongeza, “huu ni mgogoro wa mipaka na unatakiwa kushughulikiwa na wizara husika na sisi tumechukua hatua hii ya haraka.”

Alisema Wizara ya Nishati na Madini iliunda tume maalum kuchunguza na kutafuta ufumbuzi wa migogoro hiyo lakini taarifa bado haijatoka na kufanyika kazi.

Alisema ugomvi uliotokea wiki iliyopita ulianza baada ya walinzi wa kampuni ya Tanzanite One kurusha mabomu ndani ya njia ya mgodi ambako wachimbaji wadogo walikuwa wakifanya kazi.

Aidha Kamanda Massawe, alithibitisha kuwepo kwa majeruhi wawili wa vurugu hizo na kwamba wamelazwa hospitalini kwa matibabui ya macho.

Kamanda aliweza kuonana na mmoja wa majeruhi aliyekifikishwa kituo hapo akiwa haoni kabla ya kupelekwa Kituo cha Afya cha Mirerani.

“Suala la uchimbaji madini Mirerani ni nyeti kwa sababu eneo hili limechukua idadi kubwa ya watu kutoka maeneo mbalimbali, hivyo tumeamua kutoa amri kusitisha uchimbaji katika eneo husika kama hatua ya haraka,” alisema.

Hata hivyo, alisema eneo hilo linalindwa na kikosi maalum cha polisi kinachofanya kazi ya doria usiku na mchana.

Mmoja wa shuhuda wa tukio hilo, Charles Mnyalu, ambaye ni mfanyakazi kiongozi wa wachimbaji wadogo, alisema wakiwa chini waliona watu wanawafuata kupitia eneo la tobo na baadaye wakapigwa mabomu kiasi cha wengine kuumizwa.

“Tunayo maganda saba ya risasi za mabomu ya machozi na maganda matatu ya risasi za mabomu ya kishindo,” alisema.

Mwenyekiti wa Chama cha Wachimbaji wadogo Tawi la Mirerani, Jaffar Bakari Faraji, alisema walikuwa na rasimu waliyoiandaa ambayo ilikuwa ikielekeza kwamba mmoja anayefanya mtobozano kwa eneo la mwingine anatakiwa arudishwe nyuma hatua 15.

Alisema rasimu hiyo iliandaliwa na Kamati ya Usuluhishi wa migogoro inapotokea na akataka hatua hizo zizingatiwe.

Alisema kwa kuwa uchimbaji wa Tanzanite unafuata mshazari tofauti na uchimbaji kama wa kisima cha maji, rasimu hiyo ikizingatiwa inaweza kuleta muafaka.

Kwa upande wake, Mary Richard, akizungumza katika eneo la mgodi huo alidai wamekuwa wakinyanyaswa katika shughuli zao za uchimbaji wa vito na hata ununuzi wa magonga (madini machafu) ambayo wanayauza na kujipatia riziki.

MWISHO