NDC YAHITAJI BILIONI 1 MRADI WA MAGADI SODA

ZAIDI ya Sh. Bilioni 1.3 zinahitaji katika awamu ya utafiti wa kiuchumi na kiteknolojia kwenye mradi wa Kiwanda cha magadi soda, bonde la Engaruka wilayani Monduli mkoani Arusha.

Tayari utafiti ulishaonyesha uwapo wa magadi soda kwenye eneo hilo unaofikia mita za ujazo Bilioni 4.7 na kila mwaka ujazo huo unajiongeza kwa mita za ujazo Milioni 1.9.

Akizungumza na MTANZANIA hivi karibuni wilayani Hai mkoani Kilimanjaro, Kaimu Mkurugenzi Mwendeshaji Shirika la Taifa la Maendeleo (NDC) Ramson Mwilangali alisema, wanachosubiriwa sasa ni upatikanaji wa kiasi hicho cha fedha.

Mwilangali aliyeongozana na Waziri wa Nchi Ofisi ya Waziri Mkuu Sera, Bunge, Kazi, Ajira na Walemavu Jenista Mhagama aliyetembelea Kiwanda cha Kilimanjaro Machine Tools kinachomilikiwa na NDC alisema, kazi ya utafiti huo inaweza kuchukua takribani Miezi 6 hadi 8.  

“Baada ya utafiti wa awali uliobaini ubora na wingi wa magadi yatakayozalishwa sasa tunaingia kwenye utafiti kuangalia masuala ya kiuchumi na kiteknolojia katika mradi huu yanaweza kutekelezwa vipi,” alisema Mwilangali na kuongeza:

“Hapo tutakuwa tumekalisha kiwango kikubwa sehemu ya mradi, tunachosubiria ni fedha kiasi cha Sh. Bilioni 1.3 tukizipata wakati wowote tunaweza kuanza awamu hiyo ya utafiti. Lakini pia uzalishaji ifikapo 2020 hadi 2022,”alisema.

Alisema Mita za ujazo Bilioni 4.7 za magadi soda zilizogundilika katika utafiti wa awali eneo la Engaruka na Selela zinaweza kutumika kwa miaka 500 ijayo, ukiwa ni mradi mkubwa kutekelezwa nchini.

Alisema baada ya kukamilika utafiti wa kiuchumi na teknolojia hatua itayofuatia ni utafiti wa athari za mradi katika mazingira na jamii utakaochukua takribani miezi 4 mpaka 6 au zaidi ikitegemea Baraza la Mazingira la Taifa (NEMC),litakavyoelekeza.

Kaimu Mkurugenzi Mwendeshaji huyo wa NDC, alisema kwa sasa Halmashauri ya wilaya ya Monduli inaendelea na kazi ya kuthamanisha mali zilizopo katika maeneo mbalimbali ya mradi huo wa magadi soda.

Kugunduliwa kwa kiasi hicho cha magadi soda Engaruka baada ya Ziwa Natron kuingia kwenye mvutano wa kimazingira na kukwamisha mradi huo eneo hilo, kunaifanya Tanzania kuwa ya tatu kwa utajiri wa magadi soda, baada ya Uturuki na Marekani.

Uzalishaji unatajwa utasaidia viwanda vingi nchini kutokana na malighali hiyo kutumika kutengeneza bidhaa kama vioo, dawa za hospitali, sabuni, karatasi, nguo na uokaji mikate hatua itakayochochea zaidi ukuaji wa sekta ya viwanda.