“ACHENI KULIA,LIPENI KODI YA PANGO”

BAADHI ya wafanyabiashara waliopo Kituo kidogo cha mabasi mjini Arusha wametakiwa kulipa malimbikizo mbalimbali ya kodi ya pango wanayodaiwa.

Kwa sasa maduka ya wafanyabiashara hao yamefungwa kutokana na mgogoro wa muda mrefu kati yao na Halmashauri ya Jiji la Arusha inayodai kodi hizo bila mafanikio kutoka kwa wafanyabiashara.

Akizungumzia madai hayo jana mjini hapa, Mkurugenzi wa Jiji hilo Athuman Kihamia alisema kwamba, hakuna mgogoro wowote kama ambavyo imekuwa ikielezwa na baadhi ya wafanyabiashara hao.

“Hakuna mgogoro kama inavyoelezwa,kilichopo maduka yamefungwa wahusika wanadaiwa malimbikizo mbalimbali ya kodi ya pango niwashauri wakalipie ili waendelee na biashara zao salama,” alisema Kihamia.

Wakizungumzia sakata hilo, wafanyabiashara hao walisema maduka hayo yamefungwa kwa miezi miwili na watu wanaojiita wawekezaji wajenzi waliowaamuru kuondoka.

Akizungumza kwa niaba yao Mwenyekiti wa wafanyabiashara wapangaji, Josephine Shirima alisema, Mei, Mwaka huu watu waliojitambulisha kama wamiliki wa maduka hayo walifika usiku na kufunga maduka bila kuelezea sababu zozote.

Alisema kwamba ndani ya kituo kidogo cha mabasi jijini hapa kuna jumla ya wafanyabiashara zaidi ya 762 wanaotegemea kipato kulisha familia zao lakini hadi sasa hawajui pakwenda hivyo walimuomba Rais Dk. John Magufuli kuingilia kati mgogoro huo.

“Tunamwomba Rais Magufuli aingilie kati mgogoro huu wa muda mrefu sisi wafanyabiashara tunanyanyasika tumejaribu kwenda mamlaka mbalimbali lakini tumegonga mwamba,”alisema Shirima.

Kwa upande wake Mwenyekiti Msaidizi, Maclean David  alisema Juni 14, Mwaka huu waliingia makubaliano  na wawakilishi wajenzi wa vibanda vya biashara na wawakilishi wapangaji katika eneo lao ambapo walikubaliana na kumaliza mgogoro huo.

“Tofauti na makubaliano hayo tunashangaa  imekuwa kinyume na sasa tumeamriwa kuondoka,” alisema David huku akionyesha Hati ya makubaliano hayo iliyosainiwa na Mkurugenzi Kihamia.