ATC KUZALISHA WATAALAM GESI ZA VIWANDANI NA MAFUTA

CHUO cha ufundi Arusha(ATC), kilichopo mjini Arusha kimeanzisha program maalumu ya kukabili ukosefu wa wataalamu katika fani za Nishati ya gesi viwandani, majumbani, mafuta na umeme wa maji nchini.

Program hiyo ya miaka mitatu inatarajiwa kuendeshwa kwa ushirikiana na Serikali ya Canada, lengo likiwa ni kuzalishali wataalamu wa kutosha katika maeneo hayo.

Akizungumza mjini hapa jana, Afisa Uhusiano wa ATC Gasto Loseiyo alisema, program hizo zinaanzishwa kutokana na mahitaji makubwa yanayolikabili taifa hususani kwa wataalamu hao.

Alisema kuanzishwa program hizo kumezingatia sera ya taifa ya uanzishwaji viwanda inayohitaji wataalamu na mafundi wakutosha kwani kukosekana kwa wataalamu hao kumekuwa kukiligharimu taifa fedha nyingi.

“Ukosefu huo umesababisha kutegemea wataalamu kutoka nje ili kuendesha mitambo mbalimbali iliyopo nchini na kujikuta mzigo ukibebwa na serikali,” alisema Loseiyo na kuongeza:

“Wanachuo watakaodahiliwa kwa ajili ya kozi hizi zinazotokana na ugunduzi wa gesi nchini watalipiwa sehemu kubwa ya gharama na Serikali huku wao wakichangia kiwango kidogo tu,” alisema.

Kwa upande wake Mkuu wa Idara ya mitambo chuoni hapo Nicolaus Mgusa, alisema kutokana na ukosefu wa wataalamu katika maeneo hayo uliilazimu Serikali kuleta wataalamu kutoka nchini India kwa ajili ya usafirishaji wa gesi kutoka Songosongo hadi jijini Dar es Salaam.

Alisema kama wataalamu hao wangekuwa wamezalishwa tayari nchini ni wazi kuwa wangefanya kazi hiyo na hatimaye kupunguza gharama zilizolipwa.

“Hata pia katika mradi wa gesi kutoka Mtwara hadi Dar es Salaam nao watalamu wake wametoka nchini China, hata wale wanaendelea na ujenzi wa mtambo wa gesi kutoka Lindi,” alisema Mgusa na kuongeza:

“Kwa sasa kuna mradi wa bomba la mafuta kutoka Hoima nchini Uganda hadi jijini Tanga, mradi huu unahitaji mafundi na wahandisi  ni wazi kuwa program hizi zitasaidia kumaliza tatizo la ukosefu wa wataalamu wazawa,” alisema.

Naye Mhadhiri katika Idara ya Uhandisi wa Umeme na Nishati chuoni hapo, Kefa Mkongwe, alisema lengo la program hizo ni kutoa wataalamu wa kutosheleza mahitaji  ya taifa.

“Program hii itawezesha kabisa kuondoa utegemezi wa wataalamu kutoka nje ya nchi,” alisema Mkongwe.

Alisema kuanzishwa kwa program hiyo ya kipekee kwa nchi za Afrika Mashariki na Kusini  kutoa mafunzo hayo kwa vitendo kutasaidia kuzalisha vijana wengi zaidi wenye ujuzi.

“Hapa kwetu kwa bahati nzuri tuna miliki kituo cha kuzalisha umeme cha Kikuletwa kilichopo wilayani Hai mkoani Kilimanjaro ambacho hiki kimekuwa msaada kwa mafunzo ya wanafunzi,” alisema Mkongwe.