WACHEZAJI KUSAKATA SOKA MLIMA KILIMANJARO

WACHEZAJI, makocha na waamuzi wa soka la wanawake kutoka nchi mbalimbali duniani wanapanda Mlima Kilimanjaro kwa ajili ya kucheza mpira kileleni  mwa mlima huo ikiwa ni sehemu ya kuenzi mchezo wa mpira wa miguu.

Msafara huo ni kutoka nchi za Marekani, Dubai, Sweden, Ujerumani, Uingereza, Palestine, Jordan na Afghanistan umelenga kuhamasicha mchezo huo kuwa sawa kwa wanawake.

Akizungumza mjini hapa jana mmoja wa wachezaji aliyewahi kuichezea timu ya taifa ya wanawake Twiga Stars Mwaka 2006 , Rajvi Ladha ambaye kwa sasa anachezea timu ya IFA Academy ya Dubai alisema wamekuja nchini kuweka rekodi mpya ya kucheza mpira kileleni mwa mlima huo mrefu barani Afrika

“Soka la wanawake Tanzania liko chini tofauti na wanaume, tutatumia ziara hii kuhamasisha ili nao upewe kipaumbele sehemu zote lakini pia kuwahamasisha wanawake wenye vipaji wajitokeze na kujiunga na timu" alisem Rajvi.

Kwa upande wake Mkurugenzi wa Taasisi ya kukuza na kuinua vipaji kwa vijana ya Future Stars Academy, Alfred Itaeli alisema ili kuleta uwiano kwa soka la wanawake wamefika kuionyesha dunia kuwa sok la wanawanke linawezekana.

"Soka la wanaume ndilo limekuwa likipata kipaumbele tofauti na wanawake sasa hawa wenzetu wamekuja ku kuhamasisha wanawake wasiwe nyuma kuonyesha uwezo wao wa soka.Tunashukuru kwa wachezaji wetu wawili wamepata nafasi ya kwenda kupanda mlima ambao ni Regina Marcel na Upendo Leonard," alisema Itael.

Alisema walitarajia timu ya wanawake ya Twiga Stars ingeweza kuja lakini ikashindikana kwani wangekuja wangepata nafasi ya kubadilishana ujuzi kwani wageni hao ni wataalamu wa soka  na wengi wao wanacheza mpira katika timu za za Taifa.

Naye Ailsa Dixson Meneja Msaidizi wa Kampuni ya Nature Discovery walioratibu safari ya wachezaji hao alisema walifanya mawasiliano na kushauriana ambapo waliona umuhimu wa kupanda mlima kwa kushirikisha wachezaji kutoka mataifa mbalimbali ili kuweka usawa kwa wanawake katika michezo huo.

Katika michezo miwili iliyochezwa katika Uwanja wa TGT nje Jiji la Arusha,timu hiyo ya Equal Playing Field  ilishinda mchezo wa kwanza dhidi ya Arusha kombaine kwa mabao 3-0 na mchezo wa pili zilitoka suluhu ya kufungana bao 1-1.

Kwa upande wa Shirikisho la mpira wa miguu Tanzania TFF,kupitia kwa Ofisa habari wake Alfred Lucas alisema kushindwa kufika kwa timu ya Twiga Stars kucheza kulitokana na kushindwa kuelewana katika baadhi ya mambo.