ASKOFU ISSANGYA:WATANZANIA KUANZA KULA ‘SIAGI’

JUHUDI, ujasiri na uimara wa kusimamia rasilimali za Taifa zinazofanywa na Rais Dk. John Magufuli, zitawawezesha Watanzania kuanza kula ‘Siagi’ kama ilivyo kwa wananchi wa nchi zilizoendelea.

Kauli hiyo ilitolewa jana mjini hapa na Askofu Mkuu wa Kanisa la International Evangelism Dk. Eliud Issangya alipozungumzia hatua madhubuti za kusimamia rasilimali za nchi zinazoendelea kufanywa.

Rais Magufuli hivi karibuni alipiga marufuku kusafirishwa kwa mchanga wa dhahabu kwenda nje ya nchi na kuunda Tume mbili zilizoichunguza kampuni ya uchimbaji dhahabu ya Accacia.

Taarifa za Tume hizo mbili zimekuwa na matokeo yaliyowaacha hoi wananchi kutokana na kuonyesha namna taifa linavyoendelea kuibiwa kupitia sekta hiyo ya madini tangu Mwaka 1998.

Akizungumzia matokeo hayo, Askofu Dk. Issangya alisema Kanisa la International Evangelism limempongeza kwa dhati na kuendelea kumuunga mkono Rais Dk. Magufuli.

“Tunatangaza kusimama naye kwa dhati na kumuunga mkono Rais katika jitihada na uthubutu wake wa kutetea haki za wanyonge,” alisema Askofu Dk. Issangya na kuongeza:

“Kwa juhudi hizi Tanzania itaingia katika kundi la nchi tajiri duniani na itawezesha wananchi wake kuanza kula ‘Siagi’ kama ilivyo kwa raia wa nchi zilizoendelea,” alisema.

Alisema kitendo cha kuhakikisha anasimama kidete kuzuia na kulinda rasilimali za taifa zilizokuwa zinaendelea kuporwa na kuhamishiwa nje ya nchi kutaanza kulinufaisha taifa na wananchi wote.

“Namuhakikishia rais kwamba tunamuombea na tunaomba wale wote waliochukua mali zetu sas waanze kurudisha, kwani hata sisi tunahitaji fedha, hakuna mtu asiyehitaji fedha kwa maendeleo ya wananchi wake.

“Mali ya nchi yetu ilikuwa imetoroshwa, tunazungumza tukiwa na hisia za rasilimali zetu tulizojaliwa na Mwenyezi Mungu, waliochukua mali zetu warudishe,tukazijengee hospitali,barabara na huduma nyingine za kijamii” alisema Askofu Dk. Issangya.

Askofu Dk. Issangya aliendelea kusisitiza na kumuomba rais kuhamishia juhudi hizo katika sekta ya wanyama pori na maliasili kwani limekuwa moja ya eneo linalotuhumiwa kuhujumu rasilimali za wananchi.

Aidha mbali na maeneo hayo Askofu huyo alimuomba pia kuliangalia eneo la wanchimbaji wadogo nchini ambao kwa miaka mingi wamekuwa wakisukumwa na kuondolewa kwenye maeneo yao ili kuwapisha wawekezaji wasio na uchungu kwa taifa.

“Wachimbaji hawa wadogo ndio wanaobakiza fedha yao nyumbani tunamuomba waangalie kwa kuwapatia maeneo rasmi ya kuendelea kuendesha shughuli zao za kutafuta riziki,” alisema Askofu Issangya.

“Nitoe wito kwa Watanzania wote tuendelee kumuunga mkono rais katika mapambano dhidi ya ufisadi, rushwa na ubadhirifu wa mali za umma,” alisema.