MAJERUHI LUCKY VINCENT WAANZA KUOGA WENYEWE

MAJERUHI watatu wa ajali ya basi la Shule ya Lucky Vincent waliopo nchini Marekani kwa matibabu zaidi hatimaye wameanza kujihudumia wenyewe ikiwamo kuoga.

Majeruhi hao walipata ajali Mei 6, Mwaka huu wilayani Karatu huku wanafunzi wenzao 33, walimu wawili na dereva wakipoteza maisha kwenye ajali hiyo.

Kupitia ukurasa wake wa Facebook Mbunge Singida Kaskazini (CCM) na Mwenyekiti mwenza wa Shirika la STEMM Lazaro Nyalandu alisema jana kuwa madaktari wamejiridhisha kuhusu maendeleo ya kupona kwa mifupa ya watoto hao.

Alisema Sadya Awadh na Wilson Tarimo walipelekwa Kituo cha CNOS-(Center for Neurosurgery Orthopedics and Spine) Jimbo la Dakota Kusini ambako madaktari walijiridhisha na maendeleo ya kupona kwa mifupa hivyo wakawatoa bandeji ngumu.

“Sadia na Wilson wameondolewa "Cast" walizokuwa wamewekewa na sasa wanaweza kujiogesha wenyewe kwa mara ya kwanza tangu wafikishwe hospitalini,” alisema Nyalandu kupitia ukursa wake wa Facebook.

Kwa upande wake Muuguzi wa Hospitali ya Mount Meru Symphrosa Silali  aliyeongozana na majeruhi akimzungumzia majeruhi Doreen Mshana aliyefanyiwa upasuaji katika uti wa mgongo alisema afya yake inaendelea kuimarika.

“Jumatatu wiki hii alitolewa pini kwenye mkono wa kushoto lakini pia ameweza kuchezesha mguu wake wa kulia hatua inayo onesha matumaini katika uponaji wake,” alisema kupitia ukurasa wa facebook wa Nyalandu.

“Watoto wote wanafanya mazoezi mara tatu kwa wiki, wapo watalaamu pia wanaowafanyia mazoezi ya namna gani wanaweza kukabiliana na vitu vilivyokuwa mbele yao ili waweze kuvisahau.

“Lakini pia kuna mazoezi ya viungo yanayowezesha viungo vyao kuendelea kuzoea kutumia mikono, miguu yao. Lakini pia wanafundishwa kufanya vitu vidogo vidogo wenyewe kama kupiga mswaki, kuoga na kuvaa nguo.

‘Jumatano watoto wote wametolewa mihogo na wanaendelea vizuri hatau ambayo imewawezesha kutumia viwiko vya mikono vizuri ikliwamo kuendelea na kufundishwa namna ya kukunja mikono na kuinyoosha,” alisema Silali na kuongeza:

“Mazoezi haya ni madogo yanaendelea kuwajengea uzoefu wa kujitegemea  Lakini kwa upande wa Doreen yeye bado ni tofauti kidogo na wenzake kwani mkono wake wa kulia alikuwa akifundishwa kutumia misuli yake ili ukae vizuri pamoja na mguu wa kushoto.

“Na anaendelea kufundishwa namna ya kukaa kwani bado anahitaji msaada wa kukaa. Kwa kweli tunashukuru kwa maombi ya Watanzania wanaoendelea kutuombea tangu tulipofika hapa Marekani,” alisema.

Aidha Muuguzi huyo aliushukuru pia Ubalozi wa Tanzania nchini Marekani kwa kuwa karibu yao na kuendelea kuwasaidia wakiwamo pia Watanzania waishio Marekani ambao nao wamekuwa wakiwatembelea na kuwasaidia kwa kila namna.