NDEGE VIVUTIO VINAVYOCHANGIA KUIMARISHA MAPATO KWENYE SEKTA YA UTALII NCHINI

JAMII nchini imetakiwa kuwatunza na kuwalinda ndege waliopo kutokana na kuwa sehemu ya vivutio vinavyochangia kuimarisha mapato kwenye sekta ya utalii.

Viumbe hao muhimu kwenye Ikolojia wametajwa kuwa na jukumu zito katika ustawi wa taifa hasa wanapotumika kusambaza mbegu kutoka mti mmoja kwenye eneo jingine.

Hayo yalisema mjini hapa jana na Mjumbe wa Bodi ya Wadhamini Asasi isiyo ya Kiserikali ya Asili ya Tanzania (Nature Tanzania),Gloria Bideberi alipoelezea faida na umuhimu wa ndege kijamii na kisayansi.

Akifafanua kuhusu faida za viumbe ndege Bideberi alisema, viumbe hao wamekuwa wakifanya kazi ya kufurahisha kwa watu kuangalia na kufuatilia aina ya maisha yao.

“Maisha ya ndege hufanya watu kusafiri umbali mrefu ili kuona aina fulani ya ndege. Lakini pia wazee wa zamani wawalitumia kutabiri baadhi ya mambo kama mvua na ujio wa wageni,” alisema.

“Kisayansi tunamuona ndege kama msambazaji muhimu wa mbegu kwani ili misitu iendelee kuwapo ni lazima mbegu zisambazwe na kazi hiyo inafanywa zaidi na ndege pia viumbe wengine.”

“Kuna baadhi ya mbegu huwa haziwezi kuota mpaka zipite kwenye matumbo ya baadhi ya wanyama na ndege ni mmoja wapo, hivyo utaona umuhimu wa viumbe hawa,” alisema Bideberi.

Kwa upande wake Mwenyekiti Bodi ya Wadhamini Asili ya Tanzania John Saleh, alisema asasi hiyo yenye miaka miwili tangu kuanzishwa kwake imekuwa ikifanya kazi kwa ushirikiano na Idara za Serikali, asasi binafsi na wadau wengine.

Alisema Asili ya Tanzania inajishughulisha na mazingira yanayotunza ndege ambayo kwa kawaida kabisa mazingira hayo huanzia nyuma ya nyumba zilizozungukwa miti.

“Tunaangalia mazingira yenye umuhimu wa uhifadhi wa ndege, maeneo ya hifadhi za Taifa, Ngorongoro, Hifadhi za Wananchi, Maziwa kama Manyara na Natron.

“Kwa muda mrefu utalii umelenga wanyama wakubwa na Tanzania bado hatujaweza kupata faida kutokana na rasilimali zetu zote, ndege ndio anakuja kuongeza thamani ya utalii nchini,” alisema Salehe.

Akifafanua zaidi Salehe alisema, wadau wa utalii kwa sasa wameanza kutambua uhitaji wa wageni kutoka ndani na nje ya nchi wanaopenda kuja,kuona na kuelewa kuhusu ndege wa Tanzania.

Naye Mratibu wa Shirika la Kimataifa la Maisha ya Ndege (Birdlife), lililopo jijini Nairobi nchini Kenya, Ken Mwathe alisema wanatekeleza miradi katika nchi 25 barani Afrika.

Akielezea kuhusu mradi uliopo Ziwa Natron Mwathe alisema mradi huo umelenga utalii endelevu katika eneo hilo ili wananchi waliopo maeneo hayo waweze kunufaika na rasilimali zilizopo.

“Pale tunatengeneza mpango mkakati wa kuongoza utalii, sehemu kama ile inahitaji mkakati utakaoelezea watalii wangapi, vivutio vya aina ngani vinapatikana pale.

 “Pia tunaangalia namna gani wadau wanafanya kazi namna gani ikiwamo mpangilio utakaohusisha wadau wote watafanya kazi ili kuendeleza utalii Ziwa Natron eneo lenye Flamingo wengi,” alisema Mwathe.