DK. HASSAN ABBAS: NIMEUSOMA UTAFITI WA MISA TANZANIA/ CIPESA UPO VIZURI

UZINDUZI TOVUTI MPYA YA MISA TANZANIA

MKURUGENZI wa Idara ya Habari Maelezo na Msemaji Mkuu wa Serikali, Dk Hassan Abbasi, amesema utafiti uliofanywa na Taasisi ya Vyombo vya Habari Kusini mwa Afrika(MISA) Tawi la Tanzania kwao ni sawa na chakula.

Akizungumza na baadhi ya wanahabari, wanasheria na wadau wengine wa habari mjini hapa wakati mjadala kuhusu mrejesho wa Utafiti wa Haki ya kupata taarifa katika ofisi za umma uliofanywa MISA Tanzania kwa kushirikiana na Shirika la CIPESA kutoka Uganda. .

Dk. Abbas katika mjadala huo aliipongeza MISA Tanzania kwa kufanya utafiti huo akisema utakuwa kioo kwa maofisa Mawasiliano serikalini pamoja na watendaji wa idara mbalimbali za serikali.

“Tafiti kama hizi zinapofanyika huwa ni chakula kwetu, niwapongeze nimesoma kurasa zote neno kwa neno,” alisema Dk. Abbas na kuongeza.

“Hii inatuonyesha hata watendaji wa serikalini wanapaswa kujitahimini katika kutoa habari kwa maofisa mawasiliano kwenye ofisi zao, tumeona kwenye utafiti baadhi waliotakiwa kutoa taaifa walivyokuwa wakijibu,” alisema. 

Dk. Abbas alisema ili kuimarisha utoaji taarifa serikalini tayari hatua madhubuti zimechukuliwa ili kuwafanya maafisa habari na watendaji wao kutoa habari kwa mujibu wa Sheria ya haki ya kupata taarifa ya mwaka 2015.

Kwa mujibu wa sheria hiyo ambayo kanuni zipo tayari, utoaji wa taarifa unatakiwa kufanyika ndani ya siku 21 na iwapo mhusika atashindwa kutoa kutekeleza atatakiwa kutoa maelezo kimaandishi akielezea sababu zilizomfanya ashindwe kutoa taarifa hizo.

“Hata kama sheria inataka taarifa zitolewe ndani ya siku 21. Lakini haimaanishi kwamba ni lazima zifike siku hizo, zinaweza kutolewa hata siku mbili baada ya kuwasilishwa kwa ombi la kupata taarifa,” alisema Dk. Abbas.

Katika uchangia huo Dk. Abbas alizindua pia tovuti mpya ya Taasisi hiyo, (Tanzania.misa.org) huku akisisitiza tatizo la utoaji taarifa halipo kwa maafisa mawasiliano pekee bali kwa wataalam (watendaji) ambao huwa hawawasaidii maafisa hao kutoa habari za uhakika.

“Sasa katika hili tumeanza kuwajengea uwezo maafisa habari kuwa kweli maafisa habari wa maeneo yao husika,” alisema Dk. Abbas na kuongeza:

“Nataka kila afisa habari awe anajua habari zote za kwake mkononi, nataka tufike huko ingawa suala kubwa kwetu kwa sasa ni utendaji kazi unaonekana,” alisema na kuongeza,” alisema.

Awali akiwasilisha utafiti huo Wakili wa Mahakama Kuu James Marenga na Mhariri wa habari wa zamani, alisema utafiti huo ulihusisha mikoa Saba kati ya 28 iliyopo nchini.

Aidha alisema siku 21 ziliwekwa kisheria ili kupata taarifa kikitumiwa kama kilivyo, hakitakuwa na msaada sana kwa waandishi wa habari kwa sababu baadhi ya taarifa wanazozitafuta kwa ajili ya habari zinaweza kupitwa na wakati hivyo kutokuwa na thamani tena ya habari.

“Utafiti huu ulifanyika kwenye mikoa 7 kati ya 28 nchini, tulihakikisha tuna upanga katika makundi mawili kundi la maandishi na kundi la kuhoji kwa mdomo, kupiga simu, email.

“Makundi hayo tuliyapangia alama kulingana na namna jibu litakavyokuwa likitolewa kwenye kundi husika, nia yetu ilikuwa ni kuhakikisha hakuna uwazi wa kisingizio cha kutoa taarifa,” alisema Wakili Marenga.

Kwa upande wake Afisa kutoka CIPESA Ashnah Kalemera yeye alielezea kuhusu utafiti uliofanyika Ukanda wa Afrika Mashariki (EAC).

“Nchi ya Sweeden ndio ilikuwaya kwanza kuwa na sheria ya haki ya kupata taarifa tangu mwaka 1766. Kwa Nchi za Afrika Mashariki Uganda ilianza mwaka 2005, Rwanda 2013, Sudani Kusini 2013, Kenya na Tanzania 2016 na Burundi hawana,” alisema Kalemera kutoka CIPESA.

Akifunga mjadala huo, Mwenyekiti wa Bodi ya Misa Tanzania, Solome Kitomari, aliishukuru Serikali kwa kushirikiana na taasisi hiyo akisema haki ya kupata taarifa ni muhimu kwa kila Mtanzania.

MWISHO.