TIMU YA USIMAMIZI WA HUDUMA YA AFYA MKOA WA LINDI YAAGIZWA KUSIMAMIA UKARABATI WA VITUO VYA AFYA

ANGELA MSIMBIRA - LINDI

MGANGA Mkuu wa Mkoa wa Lindi Ganchwele Makenge ameiagiza timu ya usimamizi wa huduma ya afya wilaya ya Lindi kuhakikisha wanasimamia na kufuatilia ukarabati wa vituo vya afya ili vijengwe kwa ubora kulingana na thamani ya fedha zilizo tolewa na Serikali.

Mganga Mkuu wa Mkoa wa Lindi Genchwele Makenge(wa tano kutoka kulia)

Makenge ameyasema hayo kwenye kikao cha pamoja kati ya wataalam kutoka Ofisi ya Rais Tawala za Mikoa na Serikali za Mitaa (OR-TAMISEMI) kwa kushiriana na wataalam kutoka Ofisi ya Mkuu wa Mkoa na Halmashauri ya Lindi mara baadaya kukagua ujenzi wa kituo cha afya  cha Nyangamara kilichopo kata ya Nyangamara, wilaya ya Lindi Mkoani Lindi

Makenge amesema Kamati ya Usimamizi wa Huduma ya Afya inalo jukumu kubwa la kusimamia shughuli zote za afya katika Mkoa wa Lindi hivyo hawana budi kuhakikisha miradi inayotekelezwa na Serikali inasimamiwa kikamilifu ikiwepo ya ukarabati wa vituo vya afya nchini.

Amesema kuwa Kamati hiyo ina hitajika kusimamia wahudumu wa afya katika kuhakikisha wanafanya kazi kwa kufuata kanuni taratibu na sheria za utumishi wa umma kwa kuwa huduamia wananchi ipasavyo na kuondoa malalamiko yaliyopo katika sekta ya afya.

Ameiagiza kamati hiyo kusimamia utendaji ulio bora katika vituo vya afya vya Mkoa wa Lindi kwa kuwahimiza wafanyakazi kutumia lugha nzuri kwa wagonjwa na kutoa huduma stahiki kwa jamii ili kuondoa kero mbalimbali ambazo wananchi wamekuwa wakizituhumu katika sekta ya afya nchini.

Baadhi ya Wataalam kutoka Ofisi ya Rais Tawala za Mikoa na Serikali za Mitaa (OR-TAMISEMI) pamoja na wataalam kutoka Mkoa wa Lindi wakikagua ujenzi wa jengo la maabara lililojengwa katika kituo cha afya cha Nyangamara mkoani Lindi.

Kwa upande wake Mganga Mkuu wa wilaya ya Lindi Bikilo Zuberi amesema kuwa mpaka sasa tayari Serikali imeshatoa Sh milioni 450 kwa ajili ya ujenzi wa nyumba ya mtumishi, Ujenzi wa Maabara, Chumba cha Upasuaji, wodi ya wazazi na chumba cha kuifadhia maiti jambo ambalo litapunguza kero kwa wananchi na kuongeza huduma za afya nchini.

Ameishukuru Serikali kwa kuweza kuboresha huduma za afya katika Mkoa wa Lindi kwa kutoa shilingi milioni 500 kwa ajili ya ukarabati wa kituo cha afya cha Nyangamara kwa kuwa awali kituo kilikuwa na changamato ya kutokuwa na majengo ya kutosha ya kutolea huduma kwa wananchi ikiwemo ukosefu wa jengo la maabara, wodi ya wazazi, chumba cha upasuaji, maabara na chumba cha kuhifadhia maiti.

Baadhi ya Wataalam kutoka Ofisi ya Rais Tawala za Mikoa na Serikali za Mitaa (OR-TAMISEMI) pamoja na wataalam kutoka Mkoa wa Lindi wakikagua ujenzi wa jengo la maabara 

Wakati huo huo Diwani wa Kata ya Nyangamara wilaya ya Lindi Mkoani Lindi Ramadhani Malingumu ameipongeza Serikali ya awamu ya Tano kwa kushirikisha wananchi kwenye ujenzi wa vituo vya afya nchini jambo ambalo litasaidia katika kutunza na kusimamia vituo vya afya vilivyojengwa.

Aidha amesema wananchi wa kata hiyo wameshirikishwa katika ujenzi wa kituo hicho kwa asilimia 100 jambo ambalo linaimarisha ushirikiano kati ya wananchi na serikali katika kuleta maendeleo .

Ujenzi wa nyumba ya Mtumishi iliyojengwa katika Kituo cha Afya cha Nyangamara kilichopo Kata ya Nyamara, wilayani Lindi Mkoa wa Lindi.