VIFARANGA VILIVYOCHOMWA VYAIBUA MIJADALA

 Mkurugenzi Mtendaji ya Shirika lisilo la kiseriali la ‘The Arusha Society Protection of Animals’ (ASPA), Livingstone Masija 

baadhi ya maboksi yakiwa na vifaranga vilivyoteketezwa kwa moto

 -ARUSHA

 WATETEZI wa haki za wanyama na ndege wamelaani uamuzi wa kuchomwa moto kwa vifaranga zaidi ya 6,000 wakisema ulikuwa wa kikatili zaidi usio na utu wala ubinadamu.

Wizara ya mifugo kwa kushirikiana na vyombo vya ulinzi na usalama mkoani Arusha juzi viliteketeza vifaranga wenye thamani ya Sh milioni 12 waliodaiwa kuingizwa kinyume cha sharia, kupitia njia za panya mpaka wa Namanga, wilayani Longido.

Akizungumza ofisini kwake Mkurugenzi Mtendani ya Shirika lisilo la kiseriali la ‘The Arusha Society Protection of Animals’ (ASPA), Livingstone Masija alisema, zoezi hilo lilikuwa la kikatili.

Gari linalodaiwa kubeba vifaranga waliokamatwa katika Mpaka wa Namanga wilayani Longido mkoani Arusha 

Maboksi ya vifaranga hai yakishushwa tayari kwa kuteketezwa 

Masija akielezea kuhusu zoezi la kuwaangamiza vifaranga hao alisema, licha ya kuwapo kwa sheria zinazosimamia katika mazingira ya viumbe kama wale bado ubinadamu ulihitajika zaidi katika kutekeleza sheria husika.

“Maamuzi yaliyochukuliwa ni ya kikatili zaidi tunajua sheria zipo, na lazima zizingatiwe lakini pia kuwe na ubinadamu katika kutekeleza majukumu ya kisheria,” alisema Masija na kuongeza:

“Kuna utaratibu wa kutekeleza jambo kama hili kwetu sisi watetezi wa haki za wanyama huwa tunazingatia haki au misingi ya wanyama,” alisema.

Alisema, kila mnyama au ndege wa kufugwa anayo haki ya kuishi na panapohitajika kumuua ipo njia bora ya kumteketeza badala ya kutumia njia za kikatili kama ilivyofanywa kwa vifaranga vya kuku.

“Yale ni mauaji ambayo kwa ujumla hayastahili wala hayawezi kuvumilika kitaifa wala kimataifa. Ustaarabu wa taifa lolote pia huonekana kwa namna ya watu wanavyoishi na wanyama na ndege wanavyofugwa.”

Alisema japokuwa bado hakujawa na taarifa sahihi zilizolipotiwa kuwa vifaraga hao walikuwa na magonjwa kama mafua ya ndege lakini hata kama wangekutwa na maambukizi hayo bado njia ya kuwaangamiza haikuwa sahihi.

“Pamoja na changamoto za magonjwa bado walitakiwa kutafuta njia sahihi za kujiridhisha kama vifaranga walikuwa na matatizo ya kiafya.

“Na hata kama wagegundulika kuwa na mafua ta ndege bado huwezi kuchukua hatua ya kuwateketeza kwa moto zipo njia sahihi za kistaarabu na si ukatili,” alisema Masija.

Aliitaja njia ya kwanza inayoweza kutumika kutetekeza vifaranga hao kwamba ilipaswa kuwapunguzia maumivu kabla ya kuwateketekeza kwa kuwapulizia dawa yenye usingizi kisha wakalewa.

“Ndege kama vifaranga wale walipaswa kupuliziwa dawa itakayowalewesha kisha wakafa wenyewe usingizini, baada ya hapo ndipo zingefuata hatua za kuwafukia au kuteketeza kama miziga badala ya kuwachoma wakiwa hai,” alisema Masija.

Akifafanua kuhusu sheria na taratibu nyingine Masija alisema, hata kama vifaranga hao waliingizwa kinyume cha sheria bado namna bora iliyopaswa kufanywa ilikuwa ni kuvirudisha vilikotoka.

“Vile vifaranga si vipodozi au maboksi ya dawa wale ni viumbe hai walipaswa kwenda mbele zaidi ya uamuzi walioufanya,” alisema Masija.

Akizungumza juzi baada ya kukamatwa kwa vifaranga hao Afisa Mfawidhi Mkaguzi wa mifugo kutoka Kituo cha Forodha kilichopo Namanga Medadi Tarimo alisema, vifaranga hivyo walikamatwa usiku Saa 3 na vyombo vya ulinzi na usalama.

Alisema mara baada ya kukamatw akwa vifaranga hivyo iliwalazimu kuviteketeza ili kulinda afya za binadamu kwa mujibu wa sheria ya wanyama ya mwaka 2003 iliyofanyiwa marekebisho mwaka 2007 ikiwa ni sehemuya mkakati wa kukabiliana na mlipuko wa mafua ya ndege katika nchi mbalimbali.