MANUSURA AJALI YA SHULE YA LUCKY VINCENT KUPANDA KIZIMBANI

Na JANETH MUSHI

-ARUSHA

MANUSURA Wilson Tarimo wa ajali ya basi la shule ya Lucky Vincent lililoua wanafunzi 32, walimu wawili na dereva anatarajiwa kupanda kizimbani kutoa ushahidi upande wa Jamhuri dhidi ya kesi inayomkabili mmiliki wa shule hiyo Innocent Moshi.

Mwanafunzi Tarimo aliyekimbizwa nchini Marekani kwa matibabu zaidi yeye na wanafunzi wenzake wawili, atakuwa miongoni mwa mashahidi 15 wa Jamhuri katika kesi namba 78 ya Mwaka huu.

Mtuhumiwa Moshi pamoja na Mwalimu Mkuu Msaidizi Longino Nkana walisomewa hoja za awali jana katika Mahakama ya wilaya ya Arumeru mkoani hapa.

Mbele ya Hakimu Mkazi Mfawidhi wa Mahakama hiyo,Desderi Kamugisha, Wakili wa Jamhuri Khalili Nuda,alisema kuwa Jamhuri wanatarajia kuwa na mashahidi 15 katika kesi hiyo pamoja na vielelezo 12.

Mashahidi wengine ni Afisa Kazi Mfawidhi wa Idara ya Kazi Mkoa wa Arusha,Wilfred Mdemi,Mohamed Matumula kutoka Kampuni ya Bima ya Zanzibar Insurance,Songoyi Jilala(Askari wa usalama barabarani Arusha),Koplo Hamad (Karatu),Inspekta Shukrani (Askari wa usalama barabarani Arusha),Komplo Saada(Traffic Arusha) na E.4312 PC Mugobe Traffic Arusha.

Wengine ni Mkuu wa Polisi wa Usalama barabarani Mkoa wa Arusha(RTO),Nuru Suleiman,G 4130 PC Mwita(Askari wa usalama barabari Karatu),Ignatus Paul(Karatu),Leonidas Gerald(Morombo) na Hamis Omary mkazi wa Sombetini.

Wakili Nuda alitaja vielelezo hivyo kuwa ni kadi ya gari lenye namba za usajili T 871 BYS,mkataba wa ununuzi wa gari,Barua ya RTO kwenda Sumatra ya Mei 8 mwaka huu,barua ya RTO kwenda Zanzibar Insurance ya Mei 8 mwaka huu,taarifa ya Zanzibar Insurance ya Mei 9 mwaka huu.

Vingine ni taarifa ya Sumatra ya Mei 9 mwaka huu,taarifa ya idara ya kazi,taarifa ya ukaguzi wa gari,ramani ya eneo la tukio,maelezo ya mshitakiwa wa kwanza na maelezo ya mshitakiwa wa pili,ambapo wakili huyo aliiomba mahakama hiyo kutoa ya wito kwa mashahidi hao.

Akiwasomea hoja hizo za awali,Wakili Nuda alidai mahakamani hapo kuwa katika kosa la kwanza linalomkabili Moshi,ni kufanya biashara ya usafirishaji abiria bila kuwa na leseni ambapo kati ya Desemba 12 mwaka jana hadi Mei 6 mwaka huu,alitumia gari katika barabara ya umma  aina ya Mitsubishi Rossa T. 871 BYS,kubeba wanafunzi.

Alidai kuwa kosa la pili ni kuruhusu gari hilo kutumika bila kuwa na bima kati ya kipindi cha Desemba 16 mwaka jana na Mei 6 mwaka huu.

Kosa la tatu ni kushindwa kuingia mkataba na mwajiriwa wake kati ya Juni Mosi mwaka jana hadi Mei 6, Mwaka huu akiwa mmiliki  wa gari hilo alishindwa kuingia mkataba wa ajira kinyume na sheria za ajira na dereva wako Dismas  Gasper ambaye kwa sasa ni marehemu.

Katika kosa la nne,Mushi anadaiwa kubeba na kuzidisha  abiria  13 ambapo Mei 6, mwaka huu akiwa Mmiliki wa Kampuni ya Lucky Vincent,katika maeneo ya Kwa Morombo,aliruhusu garinuilo kubeba abiria 38 badala ya abiria 25.

Katika kesi hiyo Nkama anakabiliwa na shitaka moja ambalo ni kuzidisha abiria katika chombo cha usafiri  ambapo akiwa muandaaji wa safari hiyo ya wanafunzi aliruhusu abiria zaidi ya 13 kupanda katika gari hilo ambalo lilipaswa kuwa na abiria 25.

"Baada ya tukio uchunguzi ulifanyika katika mamlaka za kutoa leseni ikiwemo Sumatra na Kampuni ya Bima ya Zanzibar Insurance na zote zilionyesha gari halikuwa na kibali cha kufanya biashara ya kubeba wanafunzi wala bima halali kwa mujibu wa sheria,"alidai

Baada ya kusomewa maelezo hayo Moshi alikiri gari hilo kwenda Karatu likiwa halina bima huku Mwalimu Mkuu Msaidizi akikiri mahakamani hapo kuwa alizidisha abiria katika safari hiyo.

Awali kabla ya kuwasomea maelezo ya awali,Wakili huyo aliiomba mahakama kuifanyia marekebisho hati hiyo ya mashitaka.

Hakimu Kamugisha aliahirisha kesi hiyo hadi Septemba 28 mwaka huu kwa ajili ya kuanza kusikilizwa ambapo mashahidi hao  wa upande wa jamhuri wataanza kutoa ushahidi ambapo pia aliwataka mawakili wa pande zote mbili kuhakikisha wanakuwepo mahakamani kwani siku hiyo hatapanga kusikiliza kesi nyingine zaidi ya hiyo.

Mwisho