MIOTO VICHAA YADHIBITIWA HIFADHI YA RUAHA

HIFADHI ya Taifa ya Ruaha inayopakana na vijiji 64 vilivyopo katika mikoa minne imefanikiwa kudhibiti matukio ya mioto vichaa inayohatarisha maisha ya viumbe hai na kambi za watalii ndani ya hifadhi hiyo.

Matukio ya kuwapo kwa mioto vichaa yalitajwa kusababishwa na majangiri au wananchi wanaoishi maeneo jirani na hifadhi hiyo wakati wanapokuwa wana andaa mashamba yao kwa ajili ya shughuli za kilimo.

Akitoa ufafanuzi kudhibitiwa kwa mioto hiyo kwenye kipindi cha Hifadhi za Taifa, “Uhifadhi endelevu kwa maendeleo” kinachoandaliwa na Shirika la Hifadhi za Taifa (TANAPA), kupitia Kituo cha Televisheni ya Taifa (TBC), Muikolojia Msaidizi Daniel Mathayo alisema, mbinu hizo zimesaidia kukabili tatizo hilo.

Daniel alizitaja mbinu hizo kuwa ni hifadhi hiyo kuwasha mioto ya awali katika maeneo hatarishi ili kuzuia mioto vichaa inayoweza kuwashwa baadaye na kusababisha uharibifu mkubwa ndani ya hifadhi.

“Kazi hii ya kuwasha moto wa awali hufanyika kila mwaka baada ya mvua kukatika ambapo huwa tunafanya kabla ya majani hayajakauka kutokana na kuzibabua nyasi ili tusimalize kabisa chakula cha wanyama,” alisema Daniel na kuongeza:   

“Kitendo hiki ni muhimu sana kwasababu kiangazi kinapoanza kukaribia husaidia kuzuia mioto vichaa inayoweza kusababishwa na majangiri, au jamii inapoandaa mashamba, sasa tusipofanya moto wa awali unapokuja moto kichaa unaweza kusababisha madhara zaidi hifadhini,” alisema.

Danieli alizitaja faida muhimu nyingine za kuwashwa kwa moto wa awali kuwa ni pamoja na kusaidia kukuza majani au chakula cha wanyama pori kwani kunapokuwa na majani yaliyokaa miaka mingi bila kuwapo majani mapya si afya kwa wanyama na viumbe hai wengine.

“Unapokuwa na mlundikano wa kila mwaka wa majani ndani ya hifadhi kwa hakika si vizuri kwa wanyama kwa moto wa awali pia hutusaidia kuleta chakula kipya kwa wanyama. Lakini pia husaidia shughuli za kitalii kwani ukichoma baadhi ya maeneo watalii wanapokuwa hifadhini huwaona wanyama kwa urahidi,” alisema Daniel na kuongeza:

“Jambo jingine moto wa awali huwasaidia askari wa hifadhi kufanya doria na ulinzi kwa wanyama kwa usalama zaidi kutokana na sehemu nyingine kutoonekana vizuri na kupitika kirahisi kwa magari au miguu ili kuwaona majangiri,” alisema .

Akielezea historia ya Hifadhi ya Ruaha ambayo ndio hifadhi kubwa zaidi nchini ikiwa na Kilometa za mraba 20,226, Mkuu wa Hifadhi hiyo Christopher Timbuka alisema, Ruaha inapatikana katika mikoa minne ambayo ni Mbeya, Njombe, Dodoma wilayani Chamwino na sehemu kubwa ya Hifadhi ikipatikana mkoani Iringa. 

“Ufikaji katika hifadhi unaweza kutumia njia kubwa mbili ambazo ni kutokea Iringa kwa barabara mpaka Ruaha na kutoka wilayani Mbarari mkoani Mbeya. Jitihada zinaendelea za kuongeza njia nyingine mbalimbali ikiwazo za kutokea Chunya mpaka Mbeya, Igurusi mpaka kuingia hifadhini,” alisema Timbuka.

Makala hizo za utalii kumewezesha wananachi kuendelea kuzijua zaidi Hifadhi za Arusha, Tarangire yenye Tembo wakubwa, Hifadhi ya Kilimanjaro yenye Mlima mrefu kuliko yote Afrika, Hifadhi ya Mkomazi yenye Swala Twiga, Serengeti, Lubondo, Hifadhi ya Udzungwa, Kitulo na Hifadhi ya Manyara iliyopo yenye Simba wapandao miti.