OLE MEDEYE: WASTAAFU MSITUTAMANISHE KUBADILI KATIBA

KAULI ya Rais Mstaafu Ali Hassan Mwinyi kwamba kama si matakwa ya Katiba ya nchi, uongozi wa Rais John Magufuli ulipaswa kuendelea kuwapo miaka yote, imeendelea kupingwa vikali na wadau nchini.

Akizungumza na MTANZANIA jana mjini hapa aliyewahi kuwa Naibu Waziri wa Ardhi, Nyumba na Maendeleo ya Makazi Serikali ya awamu ya Nne, Dk. Goodluck Ole Medeye aliwataka viongozi wastaafu wasiwatamanishe raia kubadili Katiba ya nchi.

Akifafanua hatari ya kauli iliyoanza kuenea miongoni mwa baadhi ya wananchi alisema, hatua hiyo ni mbaya kwani inaweza kuleta kiongozi asiye na maadili (fisadi) na mwisho wa siku  wananchi wakashindwa kumtoa.

“Niwashauri viongozi wetu hususani wastaafu wasitutamanishe kubadili Katiba kwa sababu ya utendaji wa kiongozi aliyepo madarakani, hii ni hatari sana,” alisema Dk. Medeye na kuongeza:

“Maoni ya Mzee Mwinyi ni mazuri tunaya heshimu. Hata hivyo ni vizuri kutambua kuwa Katiba hiyo ambayo yeye alishiriki kuitunga iliweka ukomo wa utumishi kwa nafasi ya Rais.

“Ili kuendeleza amani tulio nayo kwani nina amini umeiona matukio kwenye nchi za Kiarabu. Lakini kwetu sisi Tanzania imetusaidia kuibua vipaji bora zaidi katika uongozi.

“Kama Katiba isingeweka ukomo na hivyo kwa kuzingatia uhodari wa Rais Jakaya Kikwete leo hii tungempataje Rais Dk. Magufuli?” Alihoji.

Dk. Medeye aliyewahi pia kuwa Mbunge wa Jimbo la Arumeru Magharibi kabla ya kukimbilia Chadema kisha UDP aliwataka wananchi kote nchini kumuunga mkono Rais Dk. Magufuli kwa kazi anazoendelea kulifanyia taifa.

“Niwaombe Watanzania tuendelee kumuomba Mwenyezi Mungu ambariki rais aliyepo kwa sasa ili atuongoze vema katika kipindi cha uongozi wake,” alisema Dk. Medeye.

Akitoa salamu za Eid El Firti katika Viwanja vya Mnazi Mmoja Dar es Salaam Mzee Mwinyi alinukuliwa na vyombo vya habari akisema laiti ingelikuwa Katiba iliyopo haikufupisha muda wa uongozi wa rais angeshauri Rais Magufuli awe rais wa Tanzania siku zote.

Alisema mambo anayoyafanya Rais Magufuli ni mazuri na yanalipeleka taifa mbele, kwani ameweza kufanya mambo mengi kwa kipindi kifupi kuliko yaliyowahi kufanywa na watangulizi wake akiwamo yeye (Mwinyi).

“Nchi imetulia, leo mnakwenda madukani hospitali ofisini unapata huduma nzuri. Hayo ndio tuyliyoyataka, kupata serikali itakayokuwa na watumishi ambao watawatumikia watu na hivyo ndivyo inavyofanya ssa kwa sababu tumepata kiongozi tuliyenaye leo” alisema Mzee Mwinyi na kuongeza:

“Huyu kiongozi ni wa kumuenzi sana, ni wa kumsaidia sana ni wa kumsifu sana, si kumsifu kwa uongo, uongo ni kumsifu kwa kazi nzuri anayoifanya si kwa manufaa yake bali kwa manufaa ya Watanzania wote pamoja na mimi niliyesimama hapa,” alisema.

Mwisho.