TRA: RAIA ASIYE NA RISITI FAINI SH.30,000

Meneja wa TRA Mkoa wa Arusha.

MAMLAKA ya Mapato nchini (TRA), Mkoa wa Arusha imewataka wananchi wanaofanya manunuzi mbalimbali kudai risiti ya malipo ili kuepuka kutozwa faini ya Sh. 30,000.

Aidha, TRA imeweka wazi kwa upande wa wafanyabiashara watakaodakwa wameuza bidhaa zozote bila kutoa stakabadhi kwa mnunuzi watalazimika kulipa faini ya Sh. Milioni 3.

Agizo hilo lilitolewa mjini hapa juzi na Meneja wa TRA Arusha, Apili Mbarouk kwenye kikao kilicholenga kuwakumbusha wananchi umuhimu wa kulipa kodi kilichohudhuriwa na Mkuu wa mkoa huo Mrisho Gambo.   

Akizungumza kwenye kikao hicho Mbarouk alisema, zoezi endelevu la ukaguzi kwa wafanyabiashara wanaouza bidhaa mbalimbali limelenga kuhakikisha kila mwananchi anatimiza wajibu wake kwa maslahi ya taifa.

“Tumeanza ukaguzi kwenye maeneo yote ya Mji wa Arusha ili kuhakikisha wafanyabiashara wanatoa risiti wanapouza bidhaa. Lakini pia wananchi wanaonunua nao pia wazidai,” alisema Mbarouk na kuongeza:

“Kwa mfanyabiashara atakayebainika hajatoa risiti atapigwa faini ya Sh. Milioni 3, huku mwananchi ambaye amenunua bidhaa bila kudai risiti hiyo atatozwa faini ya Sh. 30,000,” alisema.

Mbarouk akielezea kuhusu kodi ya majengo alisema hadi Mei, Mwaka huu, walikuwa wamekusanya Sh. Bilioni 1, na kwa siku zilizobaki kabla ya mwaka wa fedha wa 2016/17 kukamilika wanatarajia kukusanya zaidi.

“Tumejipanga zaidi kukusanya kwenye maeneo yasipimwa na kufanyiwa uthamini ambako wamiliki watalipa Sh. 15,000 kwa mwaka na maeneo yaliyopimwa wamiliki wanalipa kadiri ya thamani ya jengo husika,” alisema.

Kwa upande wake Gambo akielezea kuhusu kodi hiyo ya majengo alisema, endapo wadaiwa wote sugu katika Jiji la Arusha wataendelea kukaidi kuilipa watafikishwa mahakamani kuanzia Julai Mwaka huu.

Alisema wamiliki wa majengo wanatakiwa kulipa kodi hiyo kwa mujibu wa sheria, kwani mapato hayo yanahitajika kwa ajili ya kuendesha na kutekeleza miradi mbalimbali ya maendeleo inayowahusu wananchi wenyewe.

“Hali si ya kuridhisha wengi hawajajitokeza. Muda uliowekwa unaelekea ukikongoni mwisho Juni 30, Mwaka huu.Baada ya hapo sheria zitachukuliwa kwa watakaobainika kuiibia Serikali mapato ya majengo wanayoyamiliki.

“Haiwezekani umiliki nyumba ugome kulipia kodi,natoa rai kulipia kwa hiari baada ya hapo faini itakuwa mara tano ya kiasi ulichotakiwa kulipa au kupelekwa mahakamani kwa mujibu wa sheria,” alisema Gambo.

Kufanyika kwa kikao hicho kulilenga kuhakikisha mapato ya Serikali yanaendelea kukusanywa kwa ufanisi ili kufikia malengo waliyojiwekea.