UVCCM: James Ole Millya atang’oka 2020

Na ELIYA MBONEA

-MANYARA

MAKAMANDA wa Umoja wa Vijana wa Chama cha Mapinduzi (UVCCM) kutoka Kata 18 za wilaya ya Simanjiro mkoani Manyara wameapa kumng’oa Mbunge wa Chadema James Ole Millya ifikapo Mwaka 2020. 

Kauli hiyo wameitoa juzi wilayani hapa mbele ya Kaimu Katibu Mkuu wa UVCCM Taifa Shaka Hamdu Shaka aliyekuwa wilayani humo kwa ajili ya shughuli za kikazi. 

Akitangaza msimamo huo kwa niaba ya Makamanda hao, Kamanda wa UVCCM wilaya ya Simanjiro Daniel Ole Materi alikiri kwamba uchaguzi wa Mwaka 2015 waliteleza hivyo wameshafahamu kosa na sasa hawatarudia. 

Alisema jukumu na mikakati wanayoendelea kuifanya kwa sasa ni kuhakikisha Chama chao kinarejesha heshima yake kwa wananchi wa Jimbo hilo baada ya kuwa imechukuliwa na mtu asiyedhamini wala kujali wananchi wa Simanjiro.

“Mpaka sasa tuna imani kubwa kwa wananchi inayojengwa na utendaji kazi wa Rais Dk. John Magufuli. Tuna kila sababu kwa CCM na Jumuiya zake  kulirudisha jimbo hili,” alisema Materi. 

Kiongozi huyo wa UVCCM wilaya aliendelea kueleza kwamba kwa wananchi wa wilaya hiyo wanayo majuto makubwa baada ya kuwa wamemchagua Mbunge Ole Millya. 

“Wananchi walitegemea kuona lolote baada ya kuwa Millya amechaguliwa sasa simekuwa tofauti na matarajio yao kwani wamegundua hana uwezo wa mbinu za kuwatumikia,” alisema Materi na kuongeza:

“Tumejipanga kuhakikisha Kata Saba zilizochukuliwa na Chadema zinarejea CCM,” alisema 

Kwa upande wake Shaka akizungumza na Makamanda hao aliwataka kuhakikisha wanathamini kiapo walichokula ambapo aliwahidi kuwa ahadi waliyopitoa kwake atawaisilisha kwa Katibu Mkuu wa CCM Abdulrahman Kinana .

Pamoja na mambo mengine waliyoyawasilisha kwake, Shaka aliwataka kujiandaa kushiriki katika chaguzi za jumuiya zinazotarajiwa kufanyika mwakani huku akiwahimiza vijana wilayani humo kujitokeza kuwania nafasi hizo za uongozi wa jumuiya.

“Katika uchaguzi huu tumejipanga kuhakikisha mchujo unakuwa mkali ili kujua nani ana sifa za kuwa kiongozi wetu badala ya kupitisha mpaka watu walioshiriki kutuuza mwaka 2015, alisema Shaka aliyehitimisha ziara yake kwa kuzindua jengo la ofisi za UVCCM lenye thamani ya Sh Milioni 10.3.

Naye Mwenyekiti wa UVCCM wilayani humo Kiria Laizer alisema tayari mkakati wa kupata ushindi katika jimbo hilo umekamilika kilichobakia kwa sasa ni kusubiria Mwaka 2020 ili Mbunge Millya afungashiwe virago vyake na wananchi kupitia sanduku la kura. 

Katika ziara hiyo ya siku tatu ilimuwezesha kiongozi huyo wa kitaifa wa UVCCM kufungua mashina mapya ya Chama hicho ikiwamo kugawa kadi kwa wanachama wapya wa Kata ya Naberere na kuzungumza na wana CCM.

MWISHO