TAKUKURU kuchuguza M. 448 za Machinjio Manyara Ranch

Na ELIYA MBONEA

-MONDULI

TAASISI ya Kuzuia na Kupambana na Rushwa (TAKUKURU), mkoani Arusha imeagizwa kuwakamata na kuwafikisha mahakamani watu wanaodaiwa kutafuna Sh Milioni 448.9 za mradi wa Machinjio ya Manyara Ranch yaliyopo wilayani Monduli mkoani hapa. 

Agizo hilo lilitolewa wilayani hapa juzi na Mkuu wa Mkoa wa Arusha Mrisho Gambo wakati wa ziara yake ya kutembelea mradi huo wa machinjia ya kisasa uliomo ndani ya shamba lenye ukubwa wa hekari 44,930.

Akiwa ameongozana na Mbunge wa Jimbo hilo (Chadema), Julius Kalanga, Mwenyekiti wa Halmashauri hiyo (Chadema), Isack Joseph na viongozi wengine Gambo alishangazwa kuona mradi huo ulioanza Mwaka 2009 ukiwa haujakamilika ilhali fedha zilishatolewa. 

Alisema zaidi ya Sh Milioni 448.9 zilishatolewa kwa ajili ya gharama za ujenzi ikiwamo jengo la machinjio zaidi ya Sh Milioni 223.5, ununuzi wa vifaa vya kisasa.

“Fedha zilizotolewa na wafadhili Shirika la Misaada la Marekani (USAID), kupitia Shirika la African Wildlife Foundation (AWF), zimeliwa na wachache wakiwamo wa Wizara ya Mifugo na Kilimo. Hili hatutalivumilia,” alisema Gambo na kluongeza:

“TAKUKURU mnapaswa kuchukua hatua kwa kuwasaka wote waliohusika kukwamisha huu mradi wafikisheni katika vyombo vya sheria wakajibu tuhuma zao,” alisema.

 ‘’Haiwezekani watu wanakula fedha za wafadhili ambao wana nina nzuri na nchi halafu tunawaacha hilo sio kwa serikali hii ya awamu ya tano  inayoongozwa na Rais Dkt John  Magufuli’’

‘’Lazima waliokula fedha za wafadhili wanapaswa kukamatwa mara moja na hiyo nawaachia TAKUKURU ndani ya siku chache zijazo nahitaji majibu kuwa wamekamatwa na kufikishwa mahakamani kujibu mashitaka yao’’ alisema Gambo.

Kwa upande wake Meneja wa AWF Fidelis Ole Kashe alilitaja lengo la kujengwa machinjio hiyo kuwa ilikuwa ni kupanuaa wigo wa vyazo vya mapato yanayotokana na kuuza mifugo na nyama bora katika kiwanda. 

Alisema kiwanda hicho cha machinjio kililenga kutoa soko la kuuza mifugo na nyama kwa vijiji vinavyozunguka machinjio hiyo ikiwamo ajira itakayotolewa kwa wananchi hususani kwa jamii zilizo jirani.

“Upungufu uliopo katika mradi huo ni kutolewa fedha nyingi lakini hadi sasa mradi umeshindwa kukamilika, kukosekana kwa mwekezaji, vifaa vilivyotumika kujenga havina ubora,” alisema Kashe na kuongeza: 

“Mradi huu haukuwa umewekewa mipango endelevu ambapo wafadhili walisitisha kutoa fedha tena kwa ajili ya kumalizia mradi husika wakati fedha zilizokuwa zimetolewa zikiwa hazina maelezo ya jinsi zilivyotumika. 

 Mwisho