TBL YAJIVUNIA WAKULIMA WA SHAYIRI KANDA YA KASKAZINI

WAKULIMA wa zao la Shayiri nchini wametakiwa kuendelea kufuata kanuni na maelekezo kutoka kwa wataalamu ili wavune shayiri nyingi kwa ekari moja na yenye ubora unaotakiwa.

Ushauri huo ulitolewa wilayani Karatu mkoani hapa hivi karibuni na Mkuu wa kitengo cha kimea cha SBMiller, Thinus Van Schoor kwa wakulima wa Shayiri wanaoendesha kilimo cha zao hilo katika wilaya zilizopo Mkoa wa Arusha na Manyara.

Akizungumza na wakulima hao Van Schoor alisema, ili wakulima hao waweze kufikia viwango vya uzalishaji wa shayiri bora kutoka shambani wanawajibu wa kufuata maelekezo na ushauri wa watalaamu.

Alisema wakiwa wanaadhimisha Siku ya Mkulima wa Shayiri, wanaowajibu wa kuendelea kutumia mbegu bora, mbolea, kupulizia dawa na kupanda kwa wakati hatua itakayowawezesha kuvuna mavuno mengi kwa ekari kama walivyofanya mwaka 2015.

“Mwaka 2015 mmefanikiwa kuzalisha Shayiri ya kutoka hii ni tofauti kabisa na miaka mingine TBL inachukua fursa hii kuwapongeza. Tunasisitiza muendelee kusikiliza wataalamu ili mzidi kufikia mafanikio zaidi ya haya,” alisema Van Shoor na kuongeza:

“Mafanikio haya yanayonesha kila mtu anaweza kufanya vizuri akifuata maelekezo, mmefanikiwa kuwa na Kilogram 686 kwa Ekari katika kwa mwaka jana haya ni mafanikio kwetu pia,” alisema.

Kwa upande wake Mshauri Mwelekezi wa kilimo cha Shayiri kutoka TBL Dk. Bennie Basson alisema kwa Mwaka 2013 wakulima wa Shayiri walilipwa kiasi cha Sh. Bilioni 7.5, Mwaka 2014 Sh. Bilioni 12 na Mwaka 2015 walilipwa Sh. Bilioni 15.3.

Alisema katika uwiano wa malipo hayo ni wazi kwamba kila mkulima moja kwa mwaka 2013 alilipwa Sh. 261,000 kwa ekari moja, Mwaka 2014 alilipwa Sh. 300,000 kwa ekari na Mwaka 2015 mkulima huyo alilipwa Sh. 680,000 kwa ekari.

Naye Mkulima wa Shayiri kutoka Monduli Juu Meporoo Leluse alisema katika msimu wa kilimo wa mwaka huu ameweza kulima Ekari 235 hata hivyo hana matumaini ya kuvuna kama alivyofanikiwa mwaka jana kutokana madai kwmba mvua ilikuwa kubwa.

“Mwaka jana nililima ekari 235 za Shayiri nikavuna gunia 11 kwa kila ekari moja. Mwaka huu sina matumaini sana kwasababu baada ya mvua kukatika jua liliwaka na wadudu wakavamia kwa wingi, hata ukipuliza dawa bado hawafi,” alisema Meporoo.