MBUNGE JOSHUA NASSARI AISHAURI SERIKALI

SERIKALI imeshauriwa kuacha kuzunguka mlango wa nyuma kisha kukamata na kuwafungulia mashitaka baadhi ya viongozi wanaosimamia maazimio ya kurejesha ardhi za umma na Taasisi za Serikali.

Kauli hiyo ilitolewa mjini hapa juzi na Mbunge wa Jimbo la Arumeru Mashariki (Chadema), Joshua Nassari alipozungumza kwa niaba ya wabunge wenzake.

Mkutano huo ulilenga kuwasilisha taarifa ya Mpango kabambe wa Mipango miji kwa jiji hilo na viunga vyake mbele ya madiwani wa Halmashauri ya Jiji la Arusha, Halmashauri ya wilaya ya Arusha na Meru.

Alisema viongozi wa kuchaguliwa na wananchi wanajitahidi kusimamia maagizo ya Serikali ikiwamo ya kuhakikisha ardhi zinazomilikiwa ofisi, Taasisi za Serikali hazivamiwa wala kuuzwa kwa watu binafsi.

“Tumepewa kura na wananchi, tunasimamia maazimio ya kuhakikisha ardhi ya umma haivamiwi. Lakini wakati tukichukua uamuzi wa kulinda mali za umma tunashangaa sisi ndio tunakamatwa kushitakiwa,” alisema Nassari na kuongeza:

“Tunakuomba Mkuu wa Mkoa tumekupa ushirikiano tunaahidi kuendelea kukupa katika masuala kama haya, tukuombe msizunguke mlango wa nyuma kutushitaki kwa kusimamia maagizo ya serikali,” alisema.

Nassari alishitakiwa hivi karibuni na madiwani wote 29 wa Halmashauri ya Meru kwa madai ya kuharibu uzio wa mfanyabiashara ambapo alisema kama wilaya ya Arumeru isipopangwa sasa upo uwezekano wa kuwa na makazi ya hovyo zaidi huko baadaye.

Kwa upande wake Mkuu wa Mkoa wa Arusha Daud Ntibenda aliyefungua mkutano huo alisema, eneo la kuandaliwa kwa mpango kabambe linahusisha wilaya za Arumeru, Arusha ambapo kwa upande wa wilaya ya Arusha inahusisha eneo lote la Jiji.

Alisema ukubwa wa eneo hilo ni Kilometa za mraba 608 ambapo kati ya hizo Kilometa 272 zipo katika Jiji la Arusha, Kilometa za Mraba 149 wilaya ya Arusha, Kilimeta za mraba 187 Halmashauri ya wilaya ya Meru.

“Jiji la Arusha huwezi kulitenganisha na maeneo yaliyopo Halmashauri mbili za Arusha na Meru kama vile Kisongo, Ngaramtoni, Tengeru na Usa River. Ninaamini mango huu utakuwa ni Dira ya kusimamia na kuongoza Jiji hili na viunga vyake kwa kipindi cha miaka 20 ijayo,” alisema Ntibenda.

Alisema kushirikishwa kwa madiwani hao waliochaguliwa Oktoba 2015 kumelenga kutoa nafassi ya ushiriki wao ili waweze kuona mawasiliano hayo kwa mara ya kwanza na kutoa mapendekezo yao kabla ya kikao cha mwisho cha wadau kitakachofanyika hivi karibuni.