WAKILI MEDIUM MWALLE KUSOMEWA MASHITAKA 42

                                                                         

NA ELIYA MBONEA, ARUSHA

WAKILI  maarufu jijini Arusha Medium Mwalle na wenzake watatu wamesomewa mashitaka 42 yanahusiana na utakatishaji wa Fedha, kugushi nyaraka na kukutwa na mali zilizopatikana kwa njia za uhalifu.  

Watuhumiwa hao walisomewa mashitaka ya awali  jana katika Mahakama ya Hakimu Mkazi Arusha mbele ya Hakimu Mkazi Mfawidhi Mustapha Siyani kabla ya kesi hiyo haijapelekwa Mahakama Kuu ya Tanzania, Kanda ya Arusha tayari kwa kusikilizwa.

Akisoma maelezo hayo ya awali Wakili wa Serikali Mkuu Oswald Tibabyakyomya alidai mahakamani hapo kwamba, watuhumiwa hao walitenda makosa hayo kati ya Mwaka 2009 hadi Mwaka 2011 kwa nyakati tofauti.

Alidai kati ya makosa hayo 42, mtuhumiwa wa kwanza Mwale anakabiliwa na makosa 27 ikiwa ni pamoja na  kuficha uhalisia wa mali  ambapo anadaiwa kutumia Sh. Milioni 70 kununua shamba katika kijiji cha Ekenywa Arumeru mkoani Arusha.

Wakili huyo alidai katika kuficha uhalisia wa mali mtuhumiwa huyo anadaiwa kutumia Sh. Milioni 250 kununua gari aina ya BMW T. 907 BTS, Dola za Marekani 330,000 alizonunulia gari aina ya Landrover Discovery T. 643 BTS.

Aliendelea kudai kwamba mtuhumiwa huyo pia alinunua nyumba mbili moja yenye thamani ya  Dola za Marekani 80,000, Kiwanja namba 22 kilichopo Ilkiurei Arumeru na Dola za Marekani 300,000 alizonunulia nyumba namba 21 eneo la Njiro jijini Arusha

Wakili huyo wa Serikali aliendelea kudai kwamba Agosti 5, 2011 mtuhumiwa Mwale alikutwa na Hundi Tatu za Kimarekani zenye thamani ya Dola 10,302, Dola 10,333 na Dola 95,079 ambapo kutokana na mazingira Hundi zilionekana kuibiwa ama zilipatikana kwa njia ya uhalifu.

Kwa upande wa Hakimu Mfawidhi Siyani aliwataka watuhumiwa hao kutojibu lolote kutokana na Mahakama hiyo kutokuwa na uwezo wa kusikiliza kesi hiyo.

Katika kesi hiyo upande wa Serikali uliiambia Mahakama hiyo kwamba umejipanga kuwasilisha mashahidi 41 na vielelezo zaidi ya 42 kutokana na vingine kuendelea kuwasilisha. Kesi hiyo iliahirishwa hadi Februari 2, Mwaka huu ambapo upande wa Jamhuri watamalizia kuwasilisha vielelezo vya ushahidi wao.

Mwisho.