WAZIRI MWIGULU NCHEMBA AZIPA MTIHANI TAASISI, IDARA

Baadhi ya nyumba za askari magereza zilizojengwa kutokana na faida iliyopatikana kupitia Shirika la Magereza Gereza Kuu Arusha.

-ARUSHA

WAZIRI wa Mambo ya Ndani ya Nchi, Mwigulu Nchemba ameziagiza Idara zilizopo wizarani kwake kufanya kazi za uzalishaji ili kuipunguzia mzigo Serikali Kuu kwani kuendelea kutumia fedha za walipa kodi kutunza wahalifu magerezani ni hasara kwa taifa .

Kauli hiyo aliitoa jana wakati wa uzunduzi wa nyumba tano za askari wa Gereza Kuu Arusha lililopo Kisongo mjini hapa zenye thamani ya Sh. Milioni 253.9 zilizotokana na faida kutoka kwenye mradi wa kilimo unaofanywa na Shirika la Magereza.

Akizungumza kwenye hafla Mwigulu alilishauri Jeshi la Magereza nchini kuangalia  uwezekano wa kuajiri kwa mikataba baadhi ya wafungwa wenye vipaji waliomaliza vifungo vyao na waliorekebishika tabia ili kuongeza nguvu kazi ya uzalishaji.

“Taasisi zilizobakia kuwa na maeneo mazuri ya uzalishaji ni Magereza, bado yana fursa ya maeneo hayo kwenda kwenye mali. Tukizalisha kwenye kilimo tunaweza kukipeleka kwenye matumizi mengine kama walivyofanya Arusha wametoka kwenye kilimo kwenda kwenye nyumba.

“Hii itakuwa chachu kwa Taasisi zilizopo wizarani kwangu, zifanye kazi ya uzalishaji kama huu ni ubunifu mzuri utakaowezesha kupunguza mzigo kwa serikali ikiwamo kuzalisha chakula kwani ni hasara kutumia fedha za walipa kodi kutunza wahalifu magerezani,” alisema Waziri Mwigulu.

Alisema ili kufikia malengo ya uzalishaji huo alishauri kwa upande wa magereza kuangalia uwezekano wa watu wenye vipaji wanaomaliza adhabu zao na kuonekana wamejirebisha hivyo watumike kuendeleza vipaji hivyo katika uzalishaji.  

“Magereza tunayo nguvu kazi ya kupunguza gharama ya uzalishaji, Nchi yeyote inayoendelea huanza na viwanda vinavyotumia nguvu kazi ili watu wapate ajira,  sisi tuna fursa ya nguvu kazi na fursa ya kuwaendeleza hao watu.

“Si wote, kuna watu wana vipaji na inatokea wanakuwa na makosa sasa inapotokea wamemaliza adhabu zao na wanaonekana kujirekebisha na hawajui wakitoka wataanzia wapi ni vyema mkaangalia utaratibu hata kama ni kwa mikataba mifupi ya kuendeleza chini ya uangalizi wenu kwa lengo la nguvu kazi ya kuzalisha zaidi,” alisema Mwigulu.

Kwa upande wake Kamishna Jenerali wa Magereza nchini, Dk. Juma Malewa alimwambia Waziri Mwigulu katika uzinduzi huo kwamba  tatizo la makazi kwa Maofisa na askari wa Magereza kwa nchini nzima bado ni kubwa.

“Nyumba tulizonazo kwa nchi nzima ni 4,221 kuna upungufu wa nyumba 9,800. Niishukuru Serikali kwani mwaka jana ilitoa Sh. Bilioni 10 kwa ajili ya ujenzi wa nyumba za maafisa na askari 320 Gereza la Ukonga Dar es Salaam,” alisema Kamishna Jenerali Dk. Malewa na kuongeza:

“Kwa upande wa ujenzi wa nyumba hizi tano hapa Arusha umefanywa na mafundi wetu kwa maana ya askari na wafungwa kama sehemu ya kuwafundisha kwa kutumia mafundi wa magereza ambapo wameweza kupunguza gharama za ujenzi kwa asilimia 50,” alisema.

Naye Mkuu wa Magereza Mkoa wa Arusha Hamis Nkubas alisema mkoa huo una upungufu mkubwa wa makazi ya askari ambapo nyumba zilizopo ni 142 na hivyo kusababisha askari na maofisa 209 kutokuwa na makazi.

Nkubas alisema nyumba hizo tano zimejengwa Sh. Milioni 50. 7 kila moja na hivyo kufanya jumla ya Sh. Milioni 253.9 ikiwa ni gharama pungufu kulingana na hali halisi kutokana na kutumia nguvu kazi na wataalamu ambao ni askari na wafungwa.

“Iwapo nyumba hizi zingejengwa kwa kutumia mkandarasi gharama ya nymba moja ingeongezeka kati ya asilimia 40 hadi 60 ya kiwango tulichotumia,” alisema Nkubas.

Aidha Mbunge wa Jimbo la Arusha Mjini (Chadema), Godbless Lema aliishauri serikali kuweka mkakati wa kupata taarifa nyingi ndani ya magereza ikiwamo kuwalinda watoa taarifa hizo.

“Ndani ya Magereza kuna taarifa nyingi kuliko nje kama kukitengenezwa mkakati mzuri mnaweza kupata taarifa nyingi zaidi za kulisaidia Taifa kuliko nje.Kwa uzoefu wangu ndani kuna taarifa nyingi,” alisema Lema.

Mwisho.