“RC Arusha mimi ni Katapila atakayelaza damu ntamzoa”

NA ELIYA MBONEA, ARUSHA

MKUU wa Mkoa wa Arusha Daud Ntibenda amewatahadharisha wafanyakazi wa umma na wananchi kuwa kazi zake anazifanya kwa mtindo wa Katapila hivyo kwa atakayelaza damu asishangae kuzolewa.

Kauli hiyo aliitoa hivi karibuni jijini hapa alipozungumza na wajumbe wa Kamati za Ulinzi na Usalama mkoa na wilaya, Maafisa, Wakaguzi na askari wa Jeshi la polisi mkoani Arusha kwenye hafla ya kuuga na kuukaribisha mwaka mpya 2015.

Akizungumza katika hafla hiyo alimshukuru Rais Jakaya Kikwete kwa kumteua kusimamia Mkoa wa Arusha wenye changamoto nyingi, hivyo aliliomba jeshi la polisi na vyombo vingine vya usalama ikiwamo jamii kumpa ushirikiano wa kazi.

“Kazi zangu zinakwenda kwa mtindo wa Katapila kwa hiyo ni waombe wafanyakazi na wananchi tusilaze damu tufanye kazi na majukumu tuliyokabidhiwa, nje ya hapo mimi nitakuzoa,” alisema RC Ntibenda.

Alisema akiwa Mwenyekiti wa Kamati ya Ulinzi na Usalama Mkoa wa Arusha tayari kwa kushirikiana na wajumbe wake wamekutana na kuangalia changamoto mbalimbali zinaoukabili mjio huo ikiwa ni pamoja na namna ya kuzitatua.

Alisema katika miaka mwili iliyopita Arusha ilikabiliwa na hali tete ya usalama wa maisha ya wananchi ikiwa ni pamoja na kutetereka kwa sekta ya utalii kutokana na vitendo vya kurusha mabomu katika nyumba za ibada, starehe na mikutano ya siasa.

“Nilipongeze utendaji wa jeshi la polisi kwa usimamizi wa amani katika mkoa wa Arusha na hasa Jiji la Arusha. Wapo waliotaka kusiwe na amani, lakini kuanzia uchaguzi mkuu wa serikali za mitaa tumeza kuufanya kwa amani,” alisema Nitenda.

Kwa upande wake Kamanda wa Polisi Mkoa wa Arusha Liberatus Sabas akizungumza katika hafla hiyo alisema kwamba waliweza kufanikiwa kukamata na kurejesha hali ya amani katika jiji hilo kutokana na kila mtu kutimiza wajibu wake.

“Hivyo basi kupitia hafla hii niwaombe wananchi wa Arusha waendelee kutoa taarifa kwa jeshi la polisi kwani wao ndio wenye taarifa zaidi za wahalifu kutokana na watu hao kuishi nao mitaani,” alisema RPC Sabas.

Naye Afisa wa Polisi mkoani hapa SSP Mary Lugola akisoma risala alisema, ni imani yao kwamba kuteuliwa kwake kuwa Mkuu wa mkoa kutachochea mshikamano uliopo baina ya polisi na jamii na kuleta mafanikio katika kipindi cha Mwaka huu.