JWTZ MNAMCHUNGUZA DIAMOND ! ANASTAHILI ADHABU KUCHEZA NGOLOLO NA SARE ZENU

JICHO LA ARUSHA

MPAKA ninapoandika makala haya, sijaamini macho yangu kama picha iliyokuwa ukurasa wa mbele wa Gazeti kongwe na mahiri hapa nchini,gazeti  la MTANZANIA ikimuonyesha msanii wa Bongo Fleva Nassib Abdul “Diamond” akitumbuiza huku akiwa amevaa sare za Jeshi la Ulinzi la Wananchi wa Tanzania (JWTZ).

Niseme tu kwamba alichofanya Diamond ni dharau iliyopitiliza dhidi ya hadhi na heshima iliyotukuka  ya JWTZ.Kila ninapoiangalia picha hiyo najiuliza maswali mengi sana ni kweli kwamba alikosa mavazi mengine ya kisanii??

Nani mshauri wa mavazi wa mwanamuziki  huyo mpaka akaamua kugeuza sare za JWTZ kuwa za kuchezea ngololo?

Mwanamuziki, msanii yeyote awe mdogo,mkubwa ana jina au hana jina bado anabakia kuwa kioo cha jamii. Sasa kama Diamond amefikia mahali pa kushindwa kuheshimu maagizo na amri zinazotolewa na vyombo vya Dola, anawafundisha nini wengine au kizazi kijacho.

Kwa hakika elimu inayotolewa na mwanamuziki huyu na hasa kwa vijana nchini ni kudharau maagizo, sheria na amri zinazotolewa na Taasisi nyeti ikiwamo JWTZ.

Nasema ni dharau kwasababu taarifa za kukataza wananchi au mtu yeyoye asiye askari na ambaye hakupitia mafunzo ya kijeshi kuvaa sare za jeshi au zinazofanana na hizo zimekuwa zikitolewa na kurudiwa mara kwa mara.

Katika kuonyesha kuwa mtindo wa kuvaa sare za JWTZ umeshika kasi pamoja na kuwapo makatazo mengi, Julai Mwaka huu JWTZ ilitoa taarifa kwa vyombo vya habari ikipiga marufuku watu wanaovaa sare za majeshi  kuacha mara moja vinginevyo wanakabiliwa na adhabu kali.

Pamoja na katazo hilo, hivi karibuni kupitia Gazeti la Mtanzania niliona picha ya askari wa JWTZ jijini Dar es Salaam akiwa anampigisha mbizi kwenye dimbwi la maji  kijana mmoja aliyemkuta akiwa amevaa sare za jeshi hilo.

Sijui ni adhabu gani nyingine iliyofuata baada ya kumtaka kijana huyo apige mbizi kwenye kijidimbwe kidogo cha maji mchana kweupee huku akiwa amevua nguo zinazofafana na sare za jeshi na kubakia na kaptula yake.

Nikirejea kwenye dharau za Diamond ambaye nimeona picha zake kwenye vyombo vya habari, ambapo Msemaji wa JWTZ Meja Joseph Masanja alikiri kuanza uchunguzi wa wasanii Diamond na Nay wa Mitego ambao kwa pamoja walivaa sare wakati wa onyesho la Fiesta jijini Dar es Salaam.

“Tumeanza uchunguzi wa kina kujua wasanii hawa wamepataje nguo hizi, sheria za nchi haziruhusu mtu ambaye si askari kuvaa sare hizi…nasema hilo ni kosa.

“Mtu yeyote atakayeonekana kuvaa nguo hizi, lazima vyombo vya dola vimchukulie hatua, kwa msingi huo sisi kwa kushirikiana na polisi tumeanza uchunguzi ili kubaini walipata wapi nani aliyehusika,” alisema Meja Masanja.

Pengine nisirudie sana yaliyosemwa na Meja Masanja. Lakini itoshe tu kusema kizazi cha Watanzania kilipofikia kipo kwenye uzao wa kambare kuanzia baba, mama mtoto wote wanafuga ndevu ndani ya nyumba, kila mmoja ana ndevu!

Hivi inawezekanaje katika hali ya kawaida matangazo yatolewe kwenye vyombo vya habari kupiga marufuku. Lakini pia hazijapita wiki mbili tangu kijana mwingine apewe suluba ya kupiga mbizi mchana kweupe Dar es Salaam kwa kuvaa sare za JWTZ, kisha msanii anayeheshimika kwa baadhi ya makundi kuamua kuonyesha dharau kwa JWTZ.

Kama nilivyosema nisiende sana huko kwa Meja Masanja, lakini kuna mahali pananipa mashaka makubwa sana hasa uwezo wa Taasisi zetu kuanzia Usalama wa Taifa, JWTZ yenyewe na hata Jeshi la Polisi.

Naamini kabisa Taasisi hizi nyeti za Serikali zipo mitaani, ninaposema zipo mitaani namaanisha zimeajiri watu wanaoishi mitaani na kushiriki kwenye aina zote za michanganyiko ya watu hapa nchini.

Sasa basi kila ninapoiangalia picha ya Diamond najiuliza hivi ni kweli katika tamasha hilo Taasisi hizo nilizozitaja hapo juu na hasa Usalama wa Taifa walishindwa kubaini mapema kuwa Diamond na Nay watapanda jukwaa wakiwa wamevaa mavazi gani? Intelijensia iko wapi?

Na ni kweli kwamba katika viwanja vyote vile vya Leaders hapakuwa na askari wa usalama wa taifa ambao wangeweza kutoa taarifa haraka kwa maofisa wa JWTZ ili waje pale wamchukua Diamond na mwenzake?

Manake tumezeoa kuona vijana wasio kuwa na majina wakipigishwa mbizi kwenye madimbwi ya maji kwa kuvaa sare zinazofanana na za JWTZ.

Kwa dharau zilizoonyeshwa na Diamond na mwenzake Nay nina tarajia kuona JWTZ likitoa fundisho kwao ili  vijana na wasanii wengine waone kumbe huwa si mzaha kuvaa sare za jeshi.

Ninachokiona mbele ya macho yangu kama mtashindwa au kutanguliwa na huruma ya kuogopa majina ya wasanii hao, JWTZ mtakuwa mmetoa mwanya kwa vijana wengine kuona kumbe hata wao wanaweza kuvaa endapo wakiwa na majina makubwa kwenye sanaa.

Sipendi kupendekeza adhabu kwa dharau walizoonyesha, itoshe tu kusema kwamba Watanzania tunatarajia kuona JWTZ likitoa onyo kali na la mfano kwa wengine wanaopenda kuvaa sare za JWTZ na zinazofanana na hizo.

Si kwamba Diamond alikuwa hajui kama anafanya kosa alipoanza kuvaa suruali, kombati, buti hadi kofia bali alifanya hivyo akijua anapima kina cha maji ya JWTZ chini ya Mkuu wa Majeshi (CDF) Davis Mwamunyange kama ni kirefu.

Nimesoma hoja za Makala ya Mwandishi Ester Mbussi. Nipenda kumuambia katika hili tukubaliane kutokubaliana Diamond amefanya kosa na kosa lake haliwezi kuhalalishwa kwa makosa yaliyofanywa na wengine.Tukifanya hivyo itakuwa ni muendelezo wa kuruhusu uvunjifu wa sheria za nchi. Achukuliwe hatua kali.  

Mwisho.