WANAHABARI, WANAJESHI WAFIKA KILELENI MLIMA KILIAMNAJRO

Na ELIYA MBONEA

-UHURU PEAK

WATANZANIA 19 wakiwamo Wanahabari, askari wa Jeshi la Wananchi (JWTZ) na maofisa wa Shirika la Hifadhi za Taifa (TANAPA) wamefika kilele cha Mlima Kilimanjaro (Uhuru Peak ) ikiwa ni maadhimisho ya miaka 55 ya Uhuru wa Tanganyika Desemba 9, Mwaka huu. 

Msafara huo wa watu 35 ulianza safari Desemba 5, Mwaka huu ukipitia Marangu chini ya Mkuu wa Majeshi na Mwenyekiti wa Bodi ya TANAPA Jenerali Mstaafu George Waitara pamoja na Mkuu wa Oparesheni na Mafunzo Makao Makuu ya Jeshi la Nchi Kavu, Brigedia Jenerali Jairos Mwaseba.
 

Akizungumza na wanahabari na maofisa wa JWTZ katika kilele cha Uhuru Peak Futi 5,895 kutoka usawa wa bahari, Meneja Uhusiano wa TANAPA Paschal Shelutete alisema, mbali na maadhimisho ya miaka 55 ya uhuru ziara hiyo ililenga pia kuhamasisha utalii wa ndani kwa Watanzania. 

Shelutete aliyekuwa miongozi mwa waliofika kileleni alisema, vivutio kama Mlima  Kilimanjaro na vingine walivyopewa Watanzania zawadi na Mwenyezi Mungu wanapaswa kujiona fahari mbele za mataifa mengine kwa kuwa na vivutio vizuri vya utalii.

“Watanzania wanapaswa kuwa na fahari na maeneo ya vivutio vya utalii walivyopewa na Mungu. Ni wahamashe wananchi wenzangu wajipange katika maisha yao kutimiza ndoto ya kupanda mlima mrefu kuliko yote Afrika,” alisema Shelutete na kuongeza: 

“Kwa kushirikiana na JWTZ na Kampuni ya Utalii ya Zara tuliandaa ziara ya kupanda Mlima Kilimanjaro na kuhahakikisha siku ya kilele cha Uhuru nasi tunakuwa kilele cha Uhuru Peak. 

Kwa upande wake Mwenyekiti wa Bodi Jeneral Mstaafu Waitara akizungumza wakati wa halfa ya kuwapokea wapanda mlima hao pamoja na mambo mengine aliwataka waandishi wa habari kutumia kalamu zao kuutangaza mlima huo pamoja na vivutio vingine. 

“Nimefarijika sana kuona waandishi wa habari Saba wakiwa wamefanikiwa kufika vituo tofauti lakini zaidi kwa watano waliofika Uhuru Peak.

“Pongezi maalum kwa wote 15 waliojitokeza, kwa waliofika mpaka mwisho wanamajibu mazuri. Na hii ninyi waandishi mliopanda mmetoa changamoto kwa waandishi wenzenu kuja kupanda Mlima Kilimanjaro,” alisema Jenerali Mstaafu Waitara.

Baada ya kujionea mazingira ya maeneo ya kuelekea kileleni Jenerali Mstaafu Waitara aliishauri TANAPA kufanya maboresho kwenye vituo vya kulala na kupumzikia wageni wanaopanda mlimani.

“Nimeingia kwenye vyumba kuna mambo tunapaswa kuyafanyia marekebisho kidogo ili kuongeza ushawishi kwa watu wengine ikiwamo kada ya viongozi na watu mashuri. 

“Kwamba tuwe angalau na vyumba vinavyojitegemea kwa kila kitu badala ya sasa hivi mgeni analazimikakulala na kutoka nje kwa ajili ya mahitaji mengine. 

“Pengine viongozi wanaweza kuwa wanasita kuja kupanda mlima kwa sababu tu ya vitu vidogo, hebu tujaribu kuboresha ili tushawishi watu mashuhuri waje,” alisema Jenerali Mstaafu Waitara. 

Mbali na askari wa JWTZ, waandishi wa habari waliofika kilele cha Uhuru Peak ni pamoja na Dikson Busagaga (Tanzania Daima), Eliya Mbonea (Mtanzania), Ramadhan (Mvungi Star Tv),Charles Ndagula (Tanzania Daima) na Shelutete kutoka TANAPA.

Waandishi wa habari waliofanikiwa kufika kituo ha Stela chenye futi 5,756  ni Iddi Uwesu (Azam Tv) na Ramadhan Siwayombe (Tanzania Daima)

Mwisho.